Wikipedia:Die vyf pilare van Wikipedia

in Wikipedia, die vrye ensiklopedie
Jump to navigation Jump to search

Wikipedia is ’n ensiklopedie[wysig bron]

Wikipedia kombineer baie kenmerke van algemene of spesialis-ensiklopedieë, kalenders en handboeke. Wikipedia is nie ’n seepkis, ’n platform vir advertensies, ’n skynuitgewer of ’n eksperiment in anargie of demokrasie nie, en ook nie ’n willekeurige versameling inligting of ’n webindeks nie. Dit is nie ’n woordeboek, koerant of ’n versameling brondokumente nie, hoewel van sy Wikimedia-medeprojekte wel is.

Wikipedia handhaaf ’n neutrale standpunt[wysig bron]

Ons streef na onpartydige artikels wat belangrike menings boekstaaf, verduidelik en op ’n manier weergee wat die belangrikheid daarvan eerbiedig. Ons vermy partydigheid; ons verskaf inligting en beskryf kwessies, eerder as om daaroor te debatteer. Op sommige terreine is daar dalk net een, algemeen erkende siening; op ander verskaf ons uiteenlopende sienings en gee hulle akkuraat en in die regte verband weer eerder as om te beweer wat "die waarheid" of "die beste siening" is. Die akkuraatheid van alle artikels moet geverifieer kan word uit betroubare, gesaghebbende bronne, veral as die onderwerp omstrede is of die artikel oor ’n lewende persoon handel. Bydraers se persoonlike ondervindings, vertolkings of opinies hoort nie op Wikipedia nie.

Wikipedia bevat vrye inhoud wat enigiemand kan gebruik, verander en versprei[wysig bron]

Omdat alle bydraers hulle inligting onder ’n vrye lisensie aan die publiek beskikbaar stel, besit geen bydraer ’n artikel nie en enige bydrae kan en sal dalk in ’n groot mate geredigeer en herversprei word. Respekteer kopieregwette en moet nooit plagiaat pleeg nie. Om nievrye media te leen word soms as billike gebruik toegelaat, maar probeer eers vrye alternatiewe vind.

Wikipedia se bydraers moet mekaar ordentlik en met respek behandel[wysig bron]

Respekteer jou mede-Wikipediane, selfs wanneer jy van hulle verskil. Pas Wikipedia-etiket toe en moenie by persoonlike aanvalle betrokke raak nie. Probeer tot ’n vergelyk kom, vermy wysigingsoorloë en moenie Wikipedia ontwrig om ’n punt te bewys nie. Handel te goeder trou en neem aan ander doen dieselfde. Wees hartlik met nuwelinge en laat hulle welkom voel. As konflik ontstaan, bespreek sienings kalm op die geskikte besprekingsblaaie, volg die regte prosedures om geskille te besleg en neem in ag dat daar duisende ander artikels op die Afrikaanse Wikipedia is om te verbeter en te bespreek.

Wikipedia het geen onwrikbare reëls nie[wysig bron]

Wikipedia het beleide en riglyne, maar hulle is nie onveranderlik nie; die inhoud en vertolking daarvan kan mettertyd aangepas word. Die beginsel en gees daarvan is belangriker as die letterlike bewoording, en soms moet ’n mens ’n uitsondering maak om Wikipedia te verbeter. Wees vrymoedig in die bywerking van artikels, maar nie roekeloos nie. En moenie bang wees om ’n fout te maak nie; (feitlik) elke vorige weergawe van ’n bladsy word bewaar en foute kan dus maklik reggestel word.