Wikipedia:Skryfwedstryd 2023 vir hoërskole
| Tipe | Skryfkompetisie vir hoërskole |
|---|---|
| Vind plaas | Jaarliks |
| Webwerf | https://www.akademie.co.za/projekte/afrikaanse-wikipedia |
| Sedert | 2023 |
Die skryfwedstryd 2023 vir hoërskole word in 2023 vir die eerste keer aangebied. Die kompetisie word deur die Afrikaanse Wikipedia in samewerking met die Suid-Afrikaanse Akademie vir Wetenskap en Kuns, Federasie van Beheerliggame van Suid-Afrikaanse Skole (FEDSAS), Pretoria FM en die Woordeboek van die Afrikaanse Taal (WAT) aangebied. Die doel van die kompetisie is om jong Wikipediane te werf om artikels op die vrye aanlyn ensiklopedie in Afrikaans te skryf. Die nasionale kompetisie word vir hoërskoolleerders in graad 8 tot graad 12 aangebied.
Kompetisie
[wysig bron]Deelnemers aan die kompetisie kan óf as individu óf as span inskryf. Van elke individuele deelnemer of span word vereis om ten minste een artikel op die Afrikaanse Wikipedia oor enige toepaslike onderwerp te skep of te vertaal vanuit 'n bestaande anderstalige Wikipedia-artikel.
Sodra die deelnemers se artikels op Wikipedia geplaas word, word die artikel gemerk deur die volgende sjabloon om ander gebruikers in kennis te stel dat die artikel nie verander mag word totdat die beoordelingsproses afgehandel is nie: {{wedstrydartikel}}
Die beoordelingsproses word in twee fases verdeel. Tydens die eerste fase word 'n aantal topartikels uit die kwalifiserende artikels gekies, wat dan tot die volgende fase deurdring. In die tweede fase word die gekose artikels vanuit fase 1 verminder tot die drie topartikels vir eerste, tweede en derde plek.
Reëls en riglyne van die kompetisie
[wysig bron]1. Wie mag inskryf?
Suid-Afrikaanse hoërskoolleerders wat tans in graad 8 tot graad 12 is.
2. Kan deelnemers alleen of as ’n skoolspan inskryf?
Individuele leerders van enige Suid-Afrikaanse hoërskool kan inskryf of ’n skoolspan kan inskryf.
3. Hoeveel leerders kan in ’n skoolspan wees?
Daar is nie ’n beperking op hoeveel leerders in ’n skoolspan mag wees nie, maar daar word aangeraai dat dit nie meer as vyf leerders is nie.
4. Mag 'n skool meer as een span inskryf?
Daar is nie ’n beperking op hoeveel spanne ’n skool mag inskryf nie. Elke span moet wel ’n aparte aanlyn inskrywingsvorm voltooi.
5. Kontakpersoon by die hoërskool:
Ongeag of deelnemers alleen of as ’n skoolspan inskryf, moet die naam van 'n kontakpersoon by die skool verskaf word wat die inskrywing ondersteun, en met wie die Afrikaanse Wikipedia kan kommunikeer tydens die kompetisie.
6. Hoeveel artikels moet ’n leerder of skoolspan skryf op die Afrikaanse Wikipedia om deel te neem aan die kompetisie?
’n Leerder wat alleen inskryf of ’n skoolspan moet minstens een artikel op die Afrikaanse Wikipedia skep.
7. Oor watter onderwerpe kan deelnemers artikels skryf?
Die Afrikaanse Wikipedia is ’n ensiklopedie. Volgens die WAT is ’n ensiklopedie ‘‘(B)oekwerk wat die geheel of 'n bepaalde deel van die menslike kennis in beknopte vorm omvat’’. Die artikels op die Afrikaanse Wikipedia deel dus feitelike kennis mee oor verskillende niefiksieonderwerpe. Die artikels kan dus nie stories wees of oor fiktiewe mense of onderwerpe handel nie. ’n Onderwerp wat handel oor iets in die wetenskappe, geskiedenis, tegnologie, ens. moet dus gekies word.
Let wel: Artikels wat as reklame of propaganda beskou word, word nie op Wikipedia aanvaar nie. Artikels oor die betrokke skool, godsdiens of politiek kwalifiseer ook nie vir die kompetisie nie.
8. Waar moet deelnemers hul artikels skep?
Deelnemers moet as gebruikers registreer en moet dan die artikel(s) op die aanlyn Afrikaanse Wikipedia skep.
9. Hoe lank moet ’n artikel wees om te kwalifiseer?
’n Voorbladartikel op die Afrikaanse Wikipedia moet minstens 30 000 grepe lank wees. Dit is 30 000 letters/karakters - spasies uitgesluit.
10. Wat anders moet ’n artikel insluit om te kwalifiseer?
Slegs artikels wat minstens een of meer naspeurbare verwysingsbronne insluit, sal beoordeel word.
11. Watter ondersteuning kry deelnemers tydens die kompetisie?
Deelnemers wat inskryf, ontvang ’n handleiding en skryfhulp. Die Afrikaanse Wikipedia se span is ook beskikbaar om deelnemers te ondersteun tydens die kompetisie met tegniese vrae oor hoe om ’n artikel op die Afrikaanse Wikipedia te skep en/of enige taalnavrae oor die inhoud van artikels.
12. Is dit verpligtend dat alle deelnemende leerders of skoolspanne ’n opleidingsessie oor die Afrikaanse Wikipedia moet bywoon?
Dit is nie verpligtend nie, maar dit word aanbeveel dat alle deelnemers registreer om ’n opleidingsessie by te woon.
13. Toekenning van die prys(e):
By die toekenning van die prys is die beoordelaars se besluit finaal. In die geval van ’n artikel wat nie suksesvol is nie, word geen korrespondensie of gesprekke daaroor gevoer nie.