Zakkie Eloff

in Wikipedia, die vrye ensiklopedie
(Aangestuur vanaf Zachariah Eloff)
Jump to navigation Jump to search
Zakkie Eloff en René van Zyl-Eloff, sy vrou wat hy as kunsstudent in Pretoria leer ken het, kies in 1962 werk vir 'n uitstalling.

Zaccharia (Zakkie) Eloff (1925 - 2004), 'n Suid-Afrikaanse skilder van die dier in die natuur, is in 1925 in Botswana gebore. Hy het egter sy skoolopleiding aan die Pretoria Boys High School ontvang, waar hy kuns onder Walter Battiss studeer het. Sy naskoolse kunsopleiding het hy in Johannesburg onder Maurice van Essche en Phyllis Gardiner ontvang. In 1957 is hy op 'n studiereis na die buiteland, waar hy aan die Central School of Art in Londen gewerk het.

Hy het ook talle Europese lande besoek. Daarna was hy tot in 1961 aan die Pretoriase Kunsskool verbonde. Hy het die onderwysberoep verlaat en 'n wildbewaarder in die Etosha-wildtuin in Namibië (destyds Suidwes) geword. Daarna was hy 'n voltydse kunstenaar op Witrivier. Eloff se werk is gekenmerk deur buitengewone waarneming en kennis van die dier se gedragspatroon in sy natuurlike omgewing.

Saam met die kunstenaar Fritz Krampe van Namibië word hy alom as die belangrikste uitbeelder van die wilde dier in die Suid-Afrikaanse kuns beskou. Sy kuns is sterk grafies georiënteer en hy het ook naam gemaak as tekenaar en grafiese kunstenaar. Sy tekeninge getuig van 'n sensitiewe, ritmiese Iyngebruik en die ekonomiese gebruik van middele. Voorbeelde van sy kuns is in verskeie openbare en private versamelings oor die hele land opgeneem.

Bronnelys[wysig | wysig bron]

  • Wêreldspektrum, Volume 6, bl.105, ISBN 908409451