Coalbrook-ramp
Die Coalbrook-ramp (ook Clydesdale-mynramp) was die grootste mynramp tot nog toe in Suid-Afrika. Die ramp het op 21 Januarie 1960 in die Coalbrookskag van die Clydesdale-steenkoolmyn naby Sasolburg in die Vrystaat plaasgevind. Altesame 435 mynwerkers het omgekom.[1] Die gebeure is deur Die Briels in hulle liedjie Ter nagedagtenis aan 435 mynwerkers beskryf.
Gebeure[wysig | wysig bron]
Om 19:00 op die betrokke dag het die skag op 'n diepte van 180 meter ondergronds ingegee.[2] Ongeveer 1 000 myners was op daardie stadium in die myn gewees. Die meeste kon met behulp van 'n skuinsskag (hellingskag) ontsnap. Reddingspanne van ander myne in die omgewing het hulle te hulp gesnel. Boorgate is geboor in gebiede waar oorlewendes na verwagting sou wees en mikrofone is in die gate laat afsak. Hulle kon egter geen teken van lewe vind nie. Die reddingspoging is na 11 dae gestaak.[3]
Oorsaak[wysig | wysig bron]
In reaksie op die nuutgeboude Taaibos-kragstasie by Kragbron het produksie van steenkool by die myn van 134 230 ton (1954) tot 2 260 660 ton per jaar (1958) toegeneem.[4]
Die ongeluk is deur 'n kaskade van gebreekte pilare veroorsaak. Slegs 'n paar pilare het aanvanklik gefaal, wat die las op aangrensende pilare verhoog het, tot hulle ook gefaal het. Die effek het uiteindelik oor 'n gebied van 324 hektaar versprei.[5]
'n Bydraende faktor was die verwydering van kool aan die bokant van die horisontale skagte. Dit het die tonnels vergroot, maar 'n gaping tussen die tonneldak en die strukture wat dit moes dra gelaat.[6]
Reaksie[wysig | wysig bron]
Ná die ramp het die Suid-Afrikaanse regering die koolmyn-navorsingsbeheerraad gestig om die veiligheid by steenkoolmyne te verbeter en navorsing oor die sterkte van pilare te doen. Die Wetenskaplike en Nywerheidsnavorsingsraad (WNNR) en die Kamer van Mynwese Navorsingsorganisasie het hulle hierin bygestaan.
Sien ook[wysig | wysig bron]
Verwysings[wysig | wysig bron]
- ↑ HAT Taal-en-feitegids, Pearson, Desember 2013, ISBN 978-1-77578-243-8
- ↑ "More than 400 miners are killed in an underground collapse at Coalbrook mine" (in Engels). Geargiveer vanaf die oorspronklike op 6 Julie 2019. Besoek op 30 Maart 2015.
- ↑ "The world's worst coal mining disasters" (in Engels). Geargiveer vanaf die oorspronklike op 9 Mei 2020. Besoek op 1 April 2015.
- ↑ "Coalbrook" (in Engels). Geargiveer vanaf die oorspronklike op 25 Maart 2015. Besoek op 2 April 2015.
- ↑ Malan, D.F.; Napier, J.A.L. (Desember 2011). "The design of stable pillars in the Bushveld Complex mines: a problem solved?". Journal of the Southern African Institute of Mining and Metallurgy. Geargiveer vanaf die oorspronklike op 24 September 2015. Besoek op 2 April 2015.
- ↑ van der Merwe, J.N. (Desember 2006). "Beyond Coalbrook: what did we really learn?" (PDF). The Journal of The Southern African Institute of Mining and Metallurgy. 106: 857–868.
Koördinate: 26°51′11.35″S 27°52′44.43″O / 26.8531528°S 27.8790083°O