Doornik

in Wikipedia, die vrye ensiklopedie
Spring na: navigasie, soek
Doornik
Tournai
Die Groot Mark, kloktoring en katedraal van Doornik
Die Groot Mark, kloktoring en katedraal van Doornik
Vlag van Doornik
Vlag
Wapen van Doornik
Wapen
Ligging van Doornik in die provinsie Hainaut
Ligging van Doornik in die provinsie Hainaut
Koördinate: 50°36′00″N 3°23′00″O
Land Vlag van België België
Gewes (deelstaat) Flag of Wallonia.svg Wallonië
Provinsie Flag of Hainaut.svg Hainaut
Regering
 - Burgemeester Christian Massy (PS)
Oppervlak
 - Munisipaliteit 213,75 km²  (82,5 vk m)
Bevolking (1 Januarie 2011)
 - Munisipaliteit 69 440
 - Digtheid 325/km² (841,7/myl2)
Poskode 7500-7548
Skakelkode(s) 069
Webwerf: www.tournai.be

Doornik (Frans: Tournai) in die Franstalige provinsie Hainaut (Nederlands: Henegouwen) is op een na die oudste stad van België en die sesde grootste van die Frankofone gewes Wallonië met sowat 69 000 inwoners (2011). Die stad, wat teen die Schelderivier lê, verwerf bekendheid deur die skilder Rogier van der Weyden en ook deur die porselein en muurtapyte wat hier vervaardig word. Twee historiese geboue is tot kulturele wêrelderfenis verklaar.

Geskiedenis[wysig]

Die stad se geskiedenis begin as 'n Gallo-Romeinse dorp (Turris Nerviorum) sowat 2 000 jaar gelede. In die 5de eeu word Doornik die hoofstad van die klein Salies-Frankiese koninkryk. Die graf van koning Childeric I is hier in die 17de eeu gevind. Met die verowering van Gallië onder sy seun koning Clovis I verskuif die middelpunt van die ryk na die gewes van die Île de France, met Parys as die nuwe hoofstad. Tot in die 9de eeu bly Doornik 'n dorp. Die biskoppe van die graafskap Vlaandere kies Doornik as die kerklike hoofstad. In die bloeitydperk van die Vlaamse lakennywerheid (11de tot 13de eeu) groei die stad tot een van die besigste sentra, en 'n aantal beroemde geleerdes van die tyd dien hier as biskoppe. Pogings om van die stad en sy omgewing 'n kerklike prinsdom te maak word deur die Vlaamse grawe en burgers verwerp. Biskop Johannes Chevrot (1430-1468) word 'n belangrike raadgewer van die Boergondiese hertog Filips en bevorder die Vlaamse skilderskool van die 15de eeu. Die stad kom later herhaaldelik onder vreemde bewind; Britte, Nederlanders en Franse oefen hul heerskappy tot in die 18de eeu uit.

Besienswaardighede[wysig]

Die cathédrale Notre-Dame

Van die duisende ou huise wat veral in die 17de en 18de eeu ontstaan het is talle in die jaar 1940 deur 'n bomaanval vernietig. Die oudste Europese burgerhuise van 1175 is gespaar (10 en 12 rue Barre Saint-Brice). Die ou stadskern is na die Tweede Wêreldoorlog grotendeels gerestoureer; hier staan die cathédrale Notre-Dame wat tussen 1140 en 1200 opgerig is. Met sy vyf torings en 'n lengte van 134 meter is dit een van die pragtigste voorbeelde van die Romaanse argitektuur in Wes-Europa. Die katedraal beskik oor 'n indrukwekkende versameling skilderye (waaronder werke van meesters soos Rubens en Jordaens) en 'n skatkamer (waar onder meer 'n altaar van 1247 met die oorblyfsels van die heilige Eleutherius en 'n madonnafiguur uit die 13de eeu wat van ivoor gemaak is vertoon word).

Doornik se kloktoring van 1200 is die oudste in België en bied met sy hoogte van 72 meter 'n uitsig oor die hele stad.

Sowel Rogier van der Weyden, 'n boorling van Doornik, asook Rubens, Van Gogh, Brueghel, Manet en Ensor is onder die skilders wie se werke in die Musée des Beaux-Arts vertoon word.

In die 18de eeu ontstaan die beroemde porselein van Doornik met sy dekor van sagte kleure. Naas hierdie kosbaarhede kan 'n mens in die Musée d'Histoire et d'Archéologie ook silwersmeewerk en plaaslik vervaardigde muurtapyte uit die 15de en 16de eeu bewonder.

In die omgewing van Doornik lok die statige kasteel van Antoing met talle voorwerpe uit die 15de en 16de eeu.

Eksterne skakels[wysig]