Fairbridge-indeks

Die Fairbridge-indeks van ‘n wye verskeidenheid Suid-Afrikaanse inligtingsbronne in die Suid-Afrikaanse Biblioteek in die Tuine in Kaapstad is van besondere kultuurhistoriese belang vir navorsers oor die verlede van Suider-Afrika.

William Ernest Fairbridge (* Kaapstad, 1863 – † Montreux, Switserland, 1943) was ‘n Suid-Afrikaanse joernalis, historikus, stigter van die eerste koerant in Rhodesië en die eerste burgemeester van Salisbury. Blykbaar is hy die man wat die naam Rhodesië vir die nuwe land aan die hand gedoen het.

Fairbridge het die gewoonte gehad om daagliks verwysings na feite vir hom van belang in ‘n wye verskeidenheid inligtingsbronne in ‘n uniforme styl op gelyke kaartjies aan te bring. Om hierdie register saam te stel het hy alle Suid-Afrikaanse rekords wat hy kon bemeester gefynkam, soos byvoorbeeld alle boeke van George McCall Theal, sy eie groot versameling van Africana en Rhodesiana, lêers vol tydskrifte en pamflette, en veral koerante van 1772 tot 1918. Ná sy aftrede as koerantredakteur het hy voltyds hiermee voortgegaan. Dit bestaan uit duisende kaartjies wat verwys na honderde Suider-Afrikaanse onderwerpe en bied ‘n sleutel tot skaars inligting.

Let wel: Moet dit nie verwar met die Fairbridge-versameling nie.

Bibliografie

• Green, Lawrence G.: In the land of afternoon. Kaapstad: Howard B. Timmins, 1950