Long Beach

in Wikipedia, die vrye ensiklopedie
Spring na: navigasie, soek

Long Beach
Long beach3.jpg

Kaart Wapen
LA County Incorporated Areas Long Beach highlighted.svg
New-Long-Beach-City-Seal.gif
Vlag
 Land Flag of the United States.svg Verenigde State
 Deelstaat Flag of California.svg Kalifornië
 County Los Angeles County
 Koördinate 33°48′N 118°9′W
 Gestig in 1880 as Willmore City
 Geïnkorporeer op 13 Desember 1897
 Oppervlakte:  
 - Totaal 133,2 vk km
 Hoogte bo seevlak 0 m
 Bevolking:  
 - Totaal (Sensus 2010) 492 682
 - Bevolkingsdigtheid 3 698,8/vk km
 Tydsone PST (UTC -8)
Somertyd: PDT (UTC -7)
 Klimaat  
 - Tipe Mediterreens
 - Gemiddelde jaarlikse temperatuur 18,5 °C
 - Gem. temp. Januarie/Julie 13,9 / 23,2 °C
 - Gemiddelde jaarlikse neerslae 328,7 mm
 Burgemeester Bob Foster
 Amptelike Webwerf longbeach.gov

Long Beach is 'n stad in die suide van die Amerikaanse deelstaat Kalifornië. Sy hawe aan die Pasifiese kus het tot een van die besigstes ter wêreld ontwikkel en is tans die tweede grootste houerhawe in die VSA. Danksy die olievelde, wat hier op- en aflandig ontgin word, is Long Beach daarnaas ook 'n sentrum van die oliebedryf. Ander belangrike plaaslike nywerhede sluit vliegtuie, motoronderdele, elektroniese en oudiovisuele toerusting en meubels in. Die ekonomiese ontwikkeling van die stad was nou gekoppel aan die groei van die plaaslike hoëtegnologie- en lug- en ruimtevaartbedrywe.

As deel van die metropolitaanse gebied van Los Angeles-Long Beach-Santa Ana - Long Beach is sowat 40 kilometer suid van Los Angeles se middestad geleë - het L.B., soos dit in die omgangstaal bekend staan, steeds in die skadu van sy groter susterstad gestaan. Nog in die sewentigerjare van die 20ste eeu was Long Beach veral berug vir sy naglewe-distrikte wat talle seelui gelok het. Intussen is sy hawegeriewe tot van die bestes wêreldwyd herontwikkel, en talle nuwe bouprojekte is aangepak wat van Long Beach 'n stad van baie hoë lewensgehalte gemaak het. Queensway Bay, 'n nuwe buurt langs die Pasifiese kus, is een van die grootste bouprojekte in die geskiedenis van Kalifornië.

Dit is tans die sewende grootste stedelike nedersetting in Kalifornië en die 39ste grootste in die Verenigde State.

Geografie en klimaat[wysig]

Long Beach is sowat 40 km (25 myl) suid van die middestad van Los Angeles geleë. Volgens die Verenigde State se Sensusburo beloop die totale oppervlakte van Long Beach 133,2 km² of 51,4 vierkante myl, waarvan 130,3 km² land en 2,9 km² water. Signal City, 'n onafhanklike stad, is as 'n enklawe temidde van Long Beach se stadsgebied geleë.

Die stadshorison van Long Beach

Die grootste deel van Long Beach het 'n Mediterreense tot halfdroë klimaat met baie sonskyndae. Vanweë die ligging aan die Stille Oseaan is Long Beach gedurende die somermaande dikwels in lae wolke en mis gehul wat oornag vorm en gewoonlik teen namiddag weer oplos. Die seewind, wat dikwels vanuit die Stille Oseaan waai, het 'n matigende invloed op somertemperature. Hittegolwe en bedompige toestande kom selde gelyktydig voor sodat die somerhitte nouliks ongemaklik is.

Die stad se geografiese ligging effens oos van die Palos Verdes-skiereiland en die kuslyn, wat in Long Beach merendeels in suidelike rigting loop, dra daartoe by dat weerspatrone merkbaar van dié van aangrensende nedersettings in die noorde en suide verskil. Die Palos Verdes-berge vorm 'n natuurlike versperring vir lugstrome wat in 'n oos-westelike rigting beweeg en die instroming van vogtige lug wat in ander kusstede in Los Angeles County, soos byvoorbeeld Manhattan Beach en Santa Monica, waargeneem kan word.

Net soos in ander Suid-Kaliforniese streke val reën hoofsaaklik in die wintermaande. Swaar reënbuie val tydens storms, maar Long Beach kry minder neerslae as nedersettings naby die San Gabriel- of San Bernardino-berge wat verder landinwaarts geleë is.