Polly Shortts
Polly Shortts is 'n heuwel[1] aan die buitewyke van Pietermaritzburg, KwaZulu-Natal, Suid-Afrika. Polly Shortts is vernoem na 'n boer wat daar naby gewoon het, en wie se hulp dikwels ingeroep is wanneer die pad teen die heuwel op modderig en onbegaanbaar geword het na afloop van swaar reën.[2].
Polly Shortts is nou bekend omdat dit geleë is op die roete van die bekende 90 km-lange ultramaraton, die Comrades-maraton. Pollys, soos dit onder deelnemers bekend staan, is ongeveer 2 kilometer lank, is besonder steil en is ongeveer 7 – 8 km vanaf die einde van die wedloop in onewe jare (wanneer dit van Durban na Pietermaritzburg gaan). Min hardlopers buiten die toptien slaag daarin om die opdraende uit te hardloop sonder om te stop.[3] In ewe getal jare (Pietermaritzburg na Durban) is Pollys naby die begin van die wedloop, en die hardlopers sal dit afdraend hardloop.