Rkatsiteli

in Wikipedia, die vrye ensiklopedie
Spring na: navigasie, soek
Rkatsiteli-druiwe

Rkatsiteli (Georgies რქაწითელი) is 'n outochtone wit druiwesoort wat sy geografiese oorsprong net soos die soort Saperawi in die streek Imeretië aan die voet van die Kaukasus het.

Naby die stad Wani is 5 000 jaar oue wynkruike met pitte van hierdie druiwesoort ontdek. Volgens die Britse wynkritikus Jancis Robinson was Rkatsiteli die belangrikste druiwesoort in die voormalige Sowjetunie. Die Sowjet-regering onder Michail Gorbatsjof het in die middel van die 1980's begin om die wingerdoppervlakte te verminder. Teen die begin van die 1990's was dit nog sowat 48 000 hektaar.

Tans word die Rkatsiteli-kultivar in Georgië, Moldawië, Armenië en Azerbeidjan nog op sowat 20 000 hektaar aangeplant. Saam met 19 000 hektaar in Bulgarye en kleiner oppervlaktes in die Volksrepubliek van Sjina, in Nieu-Seeland, Kanada en aan die ooskus van die Verenigde State beloop die kultivar se oppervlakte wêreldwyd sowat 40 000 hektaar.

Vir die internasionale mark word veral strooigeel vars wyne gekelder, terwyl Georgiërs die voorkeur aan swaar wyne met 'n oksidatiewe karakter gee. In die algemeen kan Rkatsiteli-wyne enkele jare lank gestoor word. Die kultivar is daarnaas ook geskik vir dessertwyne of wyne volgens die sjerrie-styl. Een van die bekendste tradisionele wyne in Georgië, die ligte en vrugtige Zinandali, is 'n versnit (cuvée) met 85 persent Rkatsiteli.