Sterrenag oor die Rhône

in Wikipedia, die vrye ensiklopedie
Spring na: navigasie, soek
Starry Night Over the Rhone.jpg
Sterrenag oor die Rhône
Vincent van Gogh, 1888
Olie op doek, 72,5 × 92 cm
Musée d'Orsay

Sterrenag oor die Rhône (September 1888) is een van Vincent van Gogh se nagskilderye van Arles. Van Gogh se bekoring met die hemel en sterre was die inspirasie vir die meeste van sy beroemde skilderye, insluitend Kafeeterras in die aand en Die Sterrenag. Die tydperk in Arles was een van die produktiefstes in sy kort loopbaan. Sy skildery Kafeeterras in die aand het Sterrenag oor die Rhône met minder as 'n maand voorafgegaan. Sterrenag is in Junie 1889 geskilder.

Die uitdaging om snags te skilder het Van Gogh geboei. Die perspektief wat hy vir Sterrenag oor die Rhône gekies het, het hom toegelaat om die weerkaatsings van die gasverligte Arles oorkant die glinsterende water van die Rhônerivier vas te vang. Die hemel daarbo word verlig deur die Groot Beer-sterrebeeld. Op die voorgrond geniet twee minnaars die sagte naglig terwyl hulle aan die oewer van die rivier wandel.

Die uitbeelding van kleur was vir Van Gogh baie belangrik. In briewe aan sy broer, Theo van Gogh, het hy baiemaal voorwerpe in sy skilderye in terme van hulle kleur beskryf. Sy nagskilderye, insluitend Sterrenag oor die Rhône, wys hoe belangrik dit vir hom was om die skitterende kleure van die naghemel en die kunsmatige lig, wat nuut tot die tydperk was, vas te vang.