Kafeeterras in die aand

in Wikipedia, die vrye ensiklopedie
Kafeeterras in die aand
Vincent van Gogh, 1888
Olie op doek, 81 × 65.5 cm
Kröller-Müller-museum

Kafeeterras in die aand , ook bekend as Die Kafeeterras by die Place du Forum, is 'n skildery deur die Nederlandse skilder Vincent van Gogh wat hy in September 1888 in Arles, Frankryk, geskilder het. Van Gogh het olieverf op doek gebruik en die skildery is 81 × 65.5 cm (32" × 26"). Dit is tans in die Kröller-Müller-museum in Otterlo, Nederland.

Kafeeterras in Oktober 2003

In die skildery beeld Van Gogh sy nuwe indrukke van die suide van Frankryk uit. Die skildery is van 'n kafee in Arles, toe Café Terrace en nou Café van Gogh. Die styl van die skildery is uniek vir Van Gogh met die warm kleure en die diepte van die perspektief.

Van Gogh het in 'n brief aan sy suster [1] geskryf nadat hy die skildery voltooi het waarin hy sy entoesiasme daaroor uitspreek:

Ek is slegs onderbreek deur my werk aan 'n nuwe skildery wat die buitekant van 'n nagkafee uitbeeld. Op die terras is daar klein figure van mense wat drankies drink. 'n Reuse geel lantern verlig die terras, die fasade, die sypaadjie en werp selfs lig op die plaveistene van die pad wat 'n pienkerige violet kleur aanneem. Die gewels van die huise, soos 'n pad wat onder 'n blou hemel gespikkel met sterre verbleik, is donkerblou of violet met 'n groen boom. Hier het jy nagskilder sonder swart, met niks anders as pragtige blou en violet en groen en die verligte omgewing kleur die kleure self swaelbleekgeel en sitroengroen. Dit amuseer my geweldig om snags op die bepaalde plek te skilder. Normaalweg teken en skilder mens die skildery bedags van die skets af. Maar ek hou daarvan om die ding onmiddellik te skilder.
Dit is waar dat ek in die donker 'n blou vir 'n groen kan aansien, 'n blou lila vir 'n pink lila, aangesien dit moeilik is om die skakerings te onderskei. Maar dit is die enigste manier om weg te kom van ons konvensionele nag met sy swak bleekwit lig, terwyl selfs 'n eenvoudige kers reeds aan ons die rykste gele en oranjes verskaf.

Dit is die eerste skildery waarin hy 'n sterreagtergrond gebruik het. Hy het voortgegaan om stergevulde uitspansels te skilder in Sterrenag oor die Rhône, wat in dieselfde maand geskilder is, en die meer bekende Sterrenag 'n jaar later. Van Gogh het ook in Portret van Eugene Boch 'n sterligagtergrond geskilder.

Verwysings[wysig | wysig bron]

  1. Brief (in Frans) (Afrikaans vertaal uit Engelse vertaling) van Vincent van Gogh na Wilhelmina van Gogh, Arles, 9 en 16 September 1888. Besoek op 1 Mei 2006.

Eksterne skakels[wysig | wysig bron]

  • Die Vincent van Gogh Gallery inskrywing oor Kafeeterras in die aand.