0 (jaar)

in Wikipedia, die vrye ensiklopedie
(Aangestuur vanaf 0 v.C.)

Die jaar 0 word nie in die Gregoriaanse kalender of sy voorganger, die Juliaanse kalender, gebruik nie. Dit is egter vir die kalender ISO 8601:2004 en vir astronomiese jaarnommering gedefinieer, waar dit ooreenstem met die Gregoriaanse jaar 1 v.C. Die jaar daarvoor word -1 genoem, wat ooreenstem met die Gregoriaanse jaar 2 v.C. Positiewe jare stem ooreen met Gregoriaanse jare ná Christus; die jaar 1 dui dus op 1 n.C.

Die jaar 0 kom ook in Boeddhistiese en Hindoekalenders voor.

Astronomiese jaartelling[wysig | wysig bron]

In sterrekunde is dit algemeen om vir die jaar 1 n.C. en later die Anno Domini-telling te gebruik, wat dieselfde as die Algemene Jaartelling (AJ) is. Maar die onderbreking tussen 1 n.C. en 1 v.C. maak dit moeilik om antieke en moderne datums te vergelyk. Die nommer 0 word dus toegeken aan die jaar voor 1 n.C., -1 aan die jaar daarvoor, ensovoorts.

Die letters "n.C.", "v.C.", "AJ" of "VHJ" (voor die Huidige Jaartelling) word weggelaat. Die jaar 1 v.C. in die historiese jaartelling is dus gelyk aan 0 in die astronomiese telling, 2 v.C. is gelyk aan -1, ensovoorts. Posotiewe jare stem ooreen met die datums ná Christus en word soms voorafgegaan deur die plusteken (+). Dié manier van jare aandui is in 1740 deur die sterrekundige Jacques Cassini in omloop gebring.[1]

ISO 8601[wysig | wysig bron]

ISO 8601:2004 (en voorheen ISO 8601:2000, maar nie ISO 8601:1988 nie) gebruik die astronomiese jaartelling in sy dataverwysingstelsels. Die "basiese" formaat vir die jaar 0 is 0000, wat ooreenstem met die historiese jaar 1 v.C. Verskeie "uitgebreide" formate is moontlik: -0000 en +0000, sowel as weergawes met vyf of ses syfers. Vroeëre jare is negatiewe jare met vier, vyf of ses syfers, wat ’n waarde het van een minder as die ooreenstemmende jaar v.C. Dus is 0001 = 2 v.C.

Suid-Asiatiese kalenders[wysig | wysig bron]

Alle eras wat vir Boeddhistiese en Hindoekalenders gebruik word, begin met die jaar 0. Al hierdie kalenders gebruik verstreke of volledige jare, terwyl die meeste kalenders lopende jare gebruik. ’n Volledige jaar het nog nie verstryk vir enige datum in die aanvanklike jaar van die era nie en die nommer 1 kan dus nie gebruik word nie. Die eerste jaar van die era word dus as 0 aangedui om te wys die era is minder as ’n jaar oud. Dit stem ooreen met die gebruik om mense se ouderdom aan te dui – kinders word nie 1 voordat die eerste jaar sedert hulle geboorte verstryk het nie (met die verskil dat hulle ouderdom in maande aangedui word, soos 6 maande, en nie met 0 nie). Dieselfde beginsel geld vir tyd op ’n 24-uur-horlosie: tydens die eerste uur van die dag word die tyd wat verstreke is, aangedui as 0 uur n minute.

Verwysings[wysig | wysig bron]

  1. Richards, E. G. (2013). "Calendars". In Urban, Sean E.; Seidelmann, P. Kenneth (reds.). Explanatory Supplement to the Astronomical Almanac (3 uitg.). Mill Valley, CA: Univ Science Books. p. 591. ISBN 1-891389-85-8.

Skakels[wysig | wysig bron]