Anastasia de Vries

Anastasia de Vries is ’n Afrikaanse joernalis, rubriekskrywer en lektor aan die Universiteit van die Wes-Kaap.

Lewe en werk[wysig | wysig bron]

Anastasia de Vries word in Ravensmead in die Kaap groot. Sy studeer aan die Universiteit van Wes-Kaapland (UWK), waar sy in 1988 ’n B.A.-graad verwerf met Afrikaans-Nederlands en Engels as hoofvakke. In 1989 behaal sy die B.A. Honneurs-graad in Nederlandse taal- en letterkunde en Afrikaanse taalgeskiedenis met lof. Dan sit sy haar nagraadse studie voort aan die Vrije Universiteit Amsterdam in Nederland, waar sy in 1992 die Drs. Litt. kwalifikasie in Nederlandse taal- en letterkunde aflê. Van Julie 1989 tot Julie 1999 is sy dosent in Nederlands aan die UWK. In 2000 sluit sy aan by die redaksie van Die Burger in Kaapstad, waar sy tot 2001 subredakteur is in die nagkantoor en rubriek- en artikelskrywer is by die Klein Karoo Nasionale Kunstefees op Oudtshoorn. Tot einde 2002 is sy onderwys- en algemene verslaggewer en rubriekskrywer by Die Burger en van Februarie 2003 tot Desember 2003 doen sy mediaskakeling vir die destydse Potchefstroomse Universiteit vir C.H.O..

Sy sluit in Februarie 2004 aan by die redaksie van Rapport in Johannesburg, waar sy diens doen as spesialisverslaggewer vir nuus en rubrieke en artikels skryf oor veral taal, politiek, kerksake, onderwys, maatskaplike kwessies en mensestories. Later word sy assistent-redakteur van Rapport in die Johannesburgkantoor. Sy word in Januarie 2009 aangewys as "Rubriekskrywer van die Jaar" in die Media24 Groep en gesekondeer na die Universiteit van Stellenbosch as Media24 se Rykie van Reenen-genoot in die Departement Joernalistiek. In 2010 neem sy by Rachelle Greeff oor as boekeredakteur van Rapport. Van die toekennings wat sy met haar joernalistiek verower sluit in ’n Mondi-toekenning vir kreatiewe skryfwerk, die FAK-prys vir ondersoekende joernalistiek en ’n FEDSAS-toekenning vir voortreflike onderwysverslaggewing. Sy verlaat Rapport aan die einde van 2012 en in Januarie 2013 sluit sy as dosent aan by die UWK, waar sy Afrikaans doseer, veral die praktiese gebruik van die taal in kreatiewe skryfwerk, joernalistiek, dokumentontwerp en –redigering. In 2015 lei sy die Universiteit van Stellenbosch se skeppende skryfwerk werksessie vir rubrieke.

Skryfwerk[wysig | wysig bron]

’n Keur uit haar verhaalrubrieke in Rapport word gebundel in^[1] “Baie melk en twie sykers”. Hierin skryf sy hoofsaaklik oor die mense van Ravensmead se verhoudings en kultuur, in ’n oorspronklike, kreatiewe styl wat wemel van fyn waarnemings en die raaksê van dinge. Sy publiseer ’n kortverhaal in Boeke-Insig. Saam met Marion Hattingh skryf sy die handboek “Leer Afrikaans” en saam met George Weideman is sy samesteller van die versamelbundel ^[2]“Nuwe stemme 1”,^[3]waarin voorheen ongepubliseerde digters se werk opgeneem word.^[4] Saam met Suzette Kotzé-Myburgh en Madri Victor stel sy die versamelbundel^[5] “Bly” saam, ’n kortverhaalbundel van die Universiteit van Stellenbosch se Woordfees van 2016, waarin kortverhale van onder andere Rachelle Greeff, Elias P. Nel, Erika Murray-Theron, Helena Gunter en Abraham H. de Vries opgeneem word.

Publikasies[wysig | wysig bron]

Jaar	Publikasies
1997	Leer Afrikaans (saam met Marion Hattingh)
2010	Baie melk en twie sykers
	Samesteller
1997	Nuwe stemme 1 (saam met George Weideman)
2016	Bly (saam met Suzette Kotzé-Myburgh en Madri Victor)