Andries Stockenström (predikant)
Ds. Andries (Stokkies) Stockenström (Prins Albert, Kaapkolonie, 24 Julie 1883 – Ficksburg, Oranje-Vrystaat, 21 Julie 1977) was ’n leraar twee gemeentes van die NG Kerk en skrywer van die NG gemeente Ficksburg se gedenkboek Historiese oorsig van die gemeente Ficksburg 1869–1957 (wat gepubliseer is met die oog op die jubileum van die kerkgebou, ingewy in 1907).
Ds. Stockenström is ná sy dood, drie dae voor sy 94ste verjaardag in die hospitaal op Ficksburg nadat hy lank siek was, beskryf as ’n kleurryke karakter wat altyd gesê het hy hou van ’n kort preek en ’n lang boerewors, aldus ’n berig in ’n plaaslike koerant (waarskynlik die Ficksburg News) ná sy dood. Buiten vier jaar as hulppredikant in die Paarl, het hy sy hele bediening in die Vrystaatse Kerk deurgebring.
Herkoms en opleiding[wysig | wysig bron]
Die stamvader van ds. Stockenström se familie is op 6 Januarie 1757 in Filipstad, Varmland, Swede, gebore en oorlede op 29 Desember 1811 tydens die slagting op Doornek, Suurberge (of Zuurberg) in die westelike distrik van die Oostelike Provinsie. Sy seun Erik Ergidius (1805–1886, ’n broer van sir Andries Stockenström) se seun, ook Andries (gebore 1850), was ds. Stockenström se vader. Die latere predikant is op Prins Albert in die Groot-Karoo gebore en het ook daar gematrikuleer met Grieks en Hebreeus as twee van sy vakke. Hy was ses jaar lank registrateur van regter C.G. Maasdorp in Kaapstad waartydens hy privaat aan die Suid-Afrikaanse Kollege, die voorloper van die Universiteit van Kaapstad) studeer het. In 1910 het hy na die Kweekskool op Stellenbosch gegaan en was, buiten sy studie in die teologie, ook junior lektor in Hebreeus.
Gemeentebediening[wysig | wysig bron]
Nadat hy in 1913 gelegitimeer is, is hy op 30 Januarie 1914 in die NG gemeente Paarl as hulpprediker vir ds. P.G.J. Meiring bevestig. Op 10 Februarie 1917 is hy in sy eerste eie werkkring, die NG gemeente Bethulie, bevestig en bly daar tot hy ’n beroep aanneem na sy tweede en laaste werkkring, die NG gemeente Ficksburg, waar hy op 9 Augustus 1927 bevestig is. Hier het hy byna 20 jaar lank gewerk tot hy sy emeritaat op 27 Maart 1949 aanvaar het. Tydens sy bediening is 'n monument vir genl. J.I.J. Fick opgerig, afsonderlike kelkies by die Nagmaal ingevoer, die pastorie in Fonteinstraat gebou en die tweede pastorie in Zonstraat aangekoop. Tydens sy tyd het die kerkraad besluit om 'n hulpprediker te benoem en eindelik om 'n medeleraar te beroep. Met sy afskeid het die kerkraad hom 'n beurs van £500 gegee. Ná sy aftrede het hy nog afgelos is verskeie gemeentes in die Vrystaat en elders: Ritchie, Knysna, Excelsior, Lindley, Kroonstad en Hennenman.
Gesinslewe[wysig | wysig bron]
Ds. Stockenström is in 1913 met mej. Ingeborg Franzsen (11 Mei 1890 – 29 Julie 1967) getroud. Sy het hom al die jare met liefde en toegewydheid bygestaan. Haar vader, Johannes (Larssen) Franzsen is op 4 Januarie 1850 in Klovning, Tysvær, Noorweë, gebore en oorlede in Kaapstad op 15 Februarie 1918. Twee dogters is uit dié huwelik gebore van wie Ingeborg (Inge) op 10 Oktober 1914 gebore is en oorlede is op 11 Oktober 2010 op Mosselbaai. Sy was getroud met Johannes Benjamin le Roux.
Lees ook[wysig | wysig bron]
Bronne[wysig | wysig bron]
- (af) De Kock, W.J. 1968. Suid-Afrikaanse Biografiese Woordeboek, deel I. Kaapstad: Nasionale Boekhandel Beperk.
- Stockenström, ds. Andries. 1957. Historie oorsig van die gemeente Ficksburg 1869–1957. Ficksburg: NG Kerkraad.
- (en) Sy genealogiese besonderhede op die webtuiste geni.com. URL besoek op 12 November 2016.