Anna Venter

Anna Sophia Venter (waarskynlik Burgersdorp, Kaapkolonie, 15 Maart 1908 – Burgersdorp, Suid-Afrika, 27 Maart 1977) was dekades lank een van die bekendste onderwyseresse op haar tuisdorp.

Mej. A.S. Venter het haar opleiding as kleinkinderonderwyseres ontvang by mej. M. Stone, wat van ’n Fröbelskool in Londen gekom het. Haar liefde vir klein kinders was so aansteeklik vir mej. Venter dat sy die opvoeding van die jong kind haar roeping gemaak het. Sy is in 1938 aangestel as prinsipale van die Voorbereidende Skool Burgersdorp. Dit was destyds een van drie skole vir blanke leerlinge op die dorp, tesame met die laer- en hoërskool. In 1946, byvoorbeeld, tydens die dorp se eeufees, het die hoërskool 120 leerlinge van st. 7 tot 10 en 10 onderwysers gehad, die laerskool 340 (met 13 leerkragte) en die voorbereidende skool 189 (met ses leerkragte).

By die ouers en kinders van Burgersdorp was sy bekend as ’n streng, gedissiplineerde maar tog simpatieke en regverdige mens; daarom is sy alom gerespekteer en bemin. Haar werk was deurgaans van besonder hoogstaande gehalte en gevolglik was sy nie net op Burgersdorp bekend nie, maar ook in wyer kring.

Vroeg in haar loopbaan reeds is sy 'n betrekking aan 'n opleidingskollege aangebied, maar vanweë haar liefde vir jong kinders was sy daarvan oortuig dat sy meer vir die kinders van haar volk sou kon doen as hoof van 'n skool vir jong kinders. Haar belangstelling in die onderwys, ontwikkeling en siel van die klein kind het gedurig toegeneem. Haar belangstelling in haar roeping het nooit verflou nie. Sy was 'n getroue lidmaat van die Gereformeerde kerk Burgersdorp en het 'n diep godsdienssin gehad waardeur sy ook die kinders van haar skool beïnvloed het.

Bron[wysig | wysig bron]

(af) Die Gereformeerde Vroueblad. 1959. Die Gereformeerde vrou 1859-1959. Potchefstroom: Potchefstroom Herald.
(af) (en) De Wet, P.J.T. 1946. Eeufees-Gedenkboek Burgersdorp, 1846–1946. Burgersdorp: Stadsraad.