Baby Reindeer
| Baby Reindeer | |
| Genre |
|
|---|---|
| Geskep deur | Richard Gadd, geskoei op die boek Baby Reindeer deur Richard Gadd. |
| Geskryf deur | Richard Gadd |
| Geregisseer deur |
|
| Met |
|
| Oorsprong | Skotland |
| Taal | Engels |
| Aantal episodes | 7 |
| Produksie | |
| Uitvoerende vervaardiger(s) |
|
| Vervaardiger(s) | Matthew Mulot |
| Venue(s) | Edinburg, Londen |
| Produksiemaatskappy | Clerkenwell Films |
| Uitsending | |
| Oorspronklike kanaal | Netflix |
| Oorspronklike lopie | 11 April 2024 |
Baby Reindeer is 'n Skotse swart komedie en dramariller vir televisie wat geskep is deur Richard Gadd. Hy speel ook die hoofrol. Dit is verwerk van sy outobiografiese eenmanvertoning.[1][2]
Die regisseurs is Weronika Tofilska en Josephine Bornebusch. Ander akteurs is Jessica Gunning, Nava Mau en Tom Goodman-Hill. Die minireeks is op 11 April 2024 op Netflix uitgereik,[3] waar dit talle kykers gelok en groot lof gekry het.
Baby Reindeer is geskoei op Gadd se werklike ervaring van agtervolging en seksuele aanranding in sy 20's. Dit bestaan uit sewe episodes. Dit is vir 11 Emmys benoem en het ses gewen, insluitende vir uitstekende beperkte reeks, vir die draaiboek vir Gadd, vir beste akteur in 'n beperkte reeks of fliek vir Gadd en vir beste vroulike byspeler in 'n beperkte reeks of fliek vir Gunning.
Storielyn
[wysig | wysig bron]Die aspirerende komediant Donny Dunn werk as 'n kroegman in London. Hy bied 'n koppie tee aan 'n klant, Martha, om haar op te vrolik. Martha begin van Donny hou en bekruip hom in persoon en aanlyn. Jare tevore is Donny se mentor die TV-skrywer Darrien O'Connor, wat dwelms aan hom verskaf. O'Connor rand Donny herhaaldelik seksueel aan en verkrag hom wanneer hy sy bewussyn van die dwelms verloor. Eindelik verbreek hulle kontak.
In die teenswoordige tyd kla Donny vir Martha by die polisie aan weens bekruiping en omdat sy sy ouers gedreig het. Sy word in hegtenis geneem en bring nege maande in die tronk deur. O'Connor en Donny ontmoet weer. Eersgenoemde stel voor hulle werk weer saam en Donny stem teensinnig in.
Rolverdeling
[wysig | wysig bron]- Richard Gadd as Donny Dunn, 'n fiktiewe weergawe van Gadd
- Jessica Gunning as Martha Scott
- Nava Mau as Teri, 'n trans terapeut wat Donny op 'n afspraakwebtuiste ontmoet
- Tom Goodman-Hill as Darrien O'Connor
- Amanda Root as Elle, Donny se ma
- Mark Lewis Jones as Gerry, Donny se pa
- Hugh Coles as Francis, Donny se vriend van dramaskool
- Danny Kirrane as Gino, Donny se medewerker
- Michael Wildman as Greggsy, Donny se medewerker
- Shalom Brune-Franklin as Keeley, Donny se vorige meisie
- Nina Sosanya as Liz, Keeley se ma en Donny se verhuurder
- Alexandria Riley as speurder Culver
- Thomas Coombes as offisier Daniels
- Tom Durant Pritchard as Jason, koöordineerder van die komediekompetisie
- Laura Smyth as Glenda, serimoniemeester by die komediekompetisie
Episodes
[wysig | wysig bron]Al sewe episodes is op 11 April 2024 terselfdertyd op Netflix uitgereik.[4]
| Episode | Titel | Regisseur | Skrywer | Uitgereik |
|---|---|---|---|---|
| 1 | "Episode 1" | Weronika Tofilska | Richard Gadd | 11 April 2024 |
Terwyl hy in 2015 in 'n kroeg in Londen werk, gee die sukkelende komediant Donny Dunn 'n gratis koppie tee aan 'n ontstelde klant. Die klant, Martha Scott, word 'n gereelde besoeker en sê sy is 'n ryk regsgeleerde. Sy vermaak Donny met haar stories. Sy raak al hoe flirteriger, en noem hom "Baby Reindeer" en ander byname. Sy begin om vir hom honderde e-posse per dag te stuur en maak hom ongemaklik. Hy neem haar teensinnig uit vir koffie, maar is ontsteld oor Martha se openbare uitbarsting. Hy volg haar huis toe en ontdek sy woon in 'n goedkoop woonstel. Hy vlug toe sy hom sien. Martha beskou dit as 'n ontwikkeling in hulle verhouding. Sy daag ongenooid op by Donny se optrede in 'n plaaslike kompetisie, en haar tussenwerpsels laat hom 'n plek kry in die halfeindstryd. Sy verklaar haar liefde vir Donny en het nog 'n uitbarsting toe hy haar hoflik probeer verwerp. Sy stuur vir hom 'n vriendskapsversoek op Facebook. Donny ontdek sy is 'n veroordeelde bekruiper. Tog aanvaar hy haar versoek.
| Episode | Titel | Regisseur | Skrywer | Uitgereik |
|---|---|---|---|---|
| 2 | "Episode 2" | Weronika Tofilska | Richard Gadd | 11 April 2024 |
Donny gaan in die geheim uit met Teri, 'n trans Amerikaanse terapeut. Hoewel hy 'n trans lewensmaat het, is Donny skaam oor sy gevoelens en hy vertel vir Teri hy is 'n bouer met die naam Tony. Martha se bekruipery raak erger. Sy lewer kommentaar op elke foto op Donny se Facebookprofiel en stuur jaloers teisterende boodskappe aan sy eksmeisie, Keeley, wie se ma, Liz, Donny se kamer aan hom verhuur. Martha begin hom ook huis toe volg ná sy skofte in die kroeg. Teri moedig Donny aan om polisie toe te gaan, maar hy weier en glo Martha is onskadelik. Hy probeer sy medewerkers oorreed om haar die kroeg te verbied, maar een van hulle stuur as 'n grap 'n boodskap aan haar van Danny se rekening af waarin hy haar vra vir anale seks. Sy glo haar gevoel vir Donny is wederkerig. Donny het 'n geslaagde afspraak met Teri terwyl hy hoog is op kokaïen, maar toe Teri hom vra om haar in die openbaar te soen, raak hy paniekerig en los haar op 'n moltreinstasie. Toe hy huis toe loop, volg Martha hom, druk hom teen 'n muur vas en gryp hom tussen sy bene.
| Episode | Titel | Regisseur | Skrywer | Uitgereik |
|---|---|---|---|---|
| 3 | "Episode 3" | Weronika Tofilska | Richard Gadd | 11 April 2024 |
Donny beken aan Teri wie hy is en sy vra hom woedend om te gaan. Martha bevriend Liz onder 'n vals naam en los 'n foto van haar met min klere in Donny se kamer. Hy dreig haar met die polisie en sy verdwyn uit sy huis en werk, maar sit permanent by 'n bushalte oorkant sy blyplek. Donny raak Martha simpatiekgesind toe sy in 'n swerfsiektetoestand verval, maar vra haar om hom uit te los. Hy maak of hy met haar opbreek sodat sy afsluiting kan kry. Martha het vir 'n kort ruk nie kontak met Donny nie. Teri woon die komediehalfeindstryd by en wil Donny 'n tweede kans gee. Sy optrede word onderbreek toe Martha hom uit die gehoor begin tart. Dit verander in 'n gewelddadige woede toe hy haar van die verhoog af bespot. Sy word uitgegooi, maar probeer later by Donny se aantrekkamer inbreek voordat sy hom en Teri agternasit. Donny en Teri kom ooreen om hulle verhouding te hervat. Hulle afspraak word egter onderbreek toe 'n woedende Martha vir hulle 'n stroom xenofobiese en transfobiese beledigings skree. Sy val Teri aan en trek 'n klos hare uit haar kop.
| Episode | Titel | Regisseur | Skrywer | Uitgereik |
|---|---|---|---|---|
| 4 | "Episode 4" | Weronika Tofilska | Richard Gadd | 11 April 2024 |
Ses maande later probeer Donny vir Martha by die plisie verkla. Toe die polisieman hom vra hoekom dit so lank geduur het voordat hy haar gerapporteer het, dink hy in 'n terugflits aan 'n paar jaar vroeër. As 'n jong komediant in Edinburg ontmoet hy Darrien, die skrywer van 'n suksesvolle TV-program. Darrien mentor hom en spoor hom aan om na Londen te trek voordat hy skielik uit sy lewe verdwyn. Donny trek na Oxford en woon 'n dramaskool by, waar hy Keeley ontmoet en by haar intrek. Hy kry 'n oproep van Darrien en begin onder sy leiding 'n TV-loodsprogram skryf. Onbewus daarvan dat Darrien hom seksueel voorberei, woon Donny gereeld naweek lange "werksessies" in sy woonstel by. Darrien moedig Donny aan om dwelms te gebruik en rand hom seksueel aan terwyl hy bedwelm is. Eindelik verkrag hy Donny terwyl hy bedwelm is. Donny verlaat Darrien, maar sy verhouding met Keeley gaan agteruit. Danny is verward en kwaad, en onderwerp hom aan roekelose seksdade met verskeie seksmaats van albei geslagte. In die hede kan Donny nie aan die polisie 'n akkurate weergawe van Martha se bekruipery gee nie, omdat hy sleg voel oor Darrien se seksuele aanranding en omdat hy hom nooit gerapporteer het nie.
| Episode | Titel | Regisseur | Skrywer | Uitgereik |
|---|---|---|---|---|
| 5 | "Episode 5" | Josephine Bornebusch | Richard Gadd | 11 April 2024 |
Martha word Donny se kroeg verbied nadat sy 'n rumoer veroorsaak het terwyl hy werk. Nadat sy Keeley op straat aangerand het, vra Liz vir Donny om uit te trek. Hy trek saam met vriende van die dramaskool in 'n woonstel in, maar is ontsteld toe hy uitvind hulle hou elke aand partytjies met dwelms. Hy bring al hoe meer tyd by Teri deur, kruip in haar woonstel weg en sê vir die eerste keer hy is biseksueel. Hulle verhouding begin agteruitgaan weens haar trauma oor Martha se aanval en sy onvermoë om 'n ereksie te behou, wat veroorsaak word deur sy trauma weens Martha en Darrien. Teri oortuig hom weer om Martha te rapporteer. By die polisiekantoor oorreed hy eindelik 'n polisieman om Martha na te slaan. Toe hulle besef sy het vorige veroordelings, neem hulle die saak ernstig op. Martha gehoorsaam die polisie se opdrag en verbreek kontak met Donny. Hy kom egter agter hy het 'n obsessie met haar, masturbeer oor 'n foto van haar en dink hom in hoe hy seks met haar het. Dit help hom om met Teri te kan seks hê en hulle verhouding verbeter. Sy ma laat vir hom 'n wanhopige stemboodskap nadat Martha vir haar vertel het Donny is in die hospitaal ná 'n ongeluk.
| Episode | Titel | Regisseur | Skrywer | Uitgereik |
|---|---|---|---|---|
| 6 | "Episode 6" | Josephine Bornebusch | Richard Gadd | 11 April 2024 |
Donny is geskok toe hy uitvind Martha val sy ouers lastig en het sy pa daarvan beskuldig dat hy 'n pedofiel is, wat hom by die werk in die moeilikheid gebring het. Toe die polisie nie help nie, probeer Donny vir Martha uitvang dat sy die geenkontakooreenkoms verbreek. Martha het egter al hulle interaksies opgeneem en die polisie waarsku hom. As gevolg daarvan maak Teri met hom uit. Die dag voordat Donny in die komedie-eindstryd moet optree, keer Martha na Donny se kroeg terug en val hom weer lastig. Toe hy haar vorige veroordelings weens bekruipery noem, val sy hom aan en breek 'n glas in sy gesig. Sy medewerkers oorreed Donny om nie 'n klag te lê nie, want dit sal hulle wanbestuur van die kroeg onthul. By die kompetisie gooi Donny handdoek in toe niemand vir 'n grap lag nie. Hy het 'n ineenstorting en beken aan die gehoor in besonderhede sy skaamte, skuld en selfhaat ná sy verkragting, die bekruipery en sy swak hantering van sy verhouding met Teri. Daarna loop hy uit die teater uit.
| Episode | Titel | Regisseur | Skrywer | Uitgereik |
|---|---|---|---|---|
| 7 | "Episode 7" | Josephine Bornebusch | Richard Gadd | 11 April 2024 |
'n Video van Donny se bekentenis versprei soos 'n veldbrand en gee sy loopbaan 'n hupstoot. Martha vind sy foonnommer uit en los vir hom honderde stemboodskappe. Toe sy dreig om sy ouers van sy verkragting en seksualiteit te vertel, reis hy na sy ouers in Skotland en vertel vir hulle alles. Sy pa onthul hy is ook seksueel misbruik, want hy het in die Katolieke Kerk grootgeword. Nadat Martha 'n stemboodskap gelaat het waarin sy dreig om sy ouers aan te val, rapporteer hy haar eindelik. Martha word gevonnis tot nege maande gevangenisstraf. Donny los komedie en op aansporing van Keely, trek hy weer in Liz se huis in. Toe Donnie op die draaiboek afkom wat hy vir Darrien geskryf het, besoek Donny hom, maar konfronteer hom nie. Darrien, wat Donny se video gesien het, bied hom 'n werk as skrywer aan. Donny aanvaar dit, maar het daarna 'n paniekaanval. Hy gaan by 'n kroeg in en luister na 'n stemboodskap van Martha waarin sy verduidelik sy noem hom "Baby Reindeer" omdat hy haar aan 'n opgestopte dier laat dink wat sy altyd as kind vasgehou het wanneer haar ouers baklei het. Donny begin huil en bestel 'n drankie. Hy besef nie hy het sy beursie vergeet nie. Uit meegevoel gee die kroegman Donny se drankie gratis vir hom, en weerspieël Donny se eerste ontmoeting met Martha.
Ontvangs
[wysig | wysig bron]Die reeks is goed ontvang.[5][6][7][8][9] Op Rotten Tomatoes het 98% van 58 resensente dit 'n positiewe resensie gegee, met 'n gemiddelde punt van 8,7/10. Die konsensus is: "Baby Reindeer kan moeilik kykbaar wees, maar dit beloon kykers ryklik met sy emosionele kompleksiteit en uitstekende toneelspel."[10] Op Metacritic het die reeks 'n gemiddelde punt van 88 uit 100 gekry, gebaseer op 17 resensies.
Baby Reindeer het sy debuut gemaak op nommer vyf van Netflix se Top-10- Engelse titels vir TV in die week 8-14 April 2024, met kyktyd van 10,4 miljoen uur.[11] Die volgende week het dit tot nommer een gestyg, met kyktyd van 52,8 miljoen uur.[12] Die reeks het in die derde en vierde week in dieselfde posisie gebly, met kyktyd van onderskeidelik 87,4 en 73,6 miljoen uur.[13][14]
Pryse
[wysig | wysig bron]Die reeks het verskeie pryse gewen, onder andere 'n Emmy en Golden Globe vir Gunning[15] en nog vyf Emmys.[16][17]
Verwysings
[wysig | wysig bron]- ↑ Donaldson, Kayleigh (24 April 2024). "Baby Reindeer: Netflix's True Crime Disease Poisons the Show". TheWrap. Geargiveer vanaf die oorspronklike op 25 April 2024. Besoek op 25 April 2024.
- ↑ Billington, Alex (22 Maart 2024). "Netflix Trailer for 'Baby Reindeer' Awkward Stalker Dark Comedy Series". FirstShowing.net. Geargiveer vanaf die oorspronklike op 29 Maart 2024. Besoek op 25 April 2024.
- ↑ "What Is Baby Reindeer? The True Story and New Series Explained". Netflix Tudum (in Engels). Besoek op 11 April 2024.
- ↑ Hudspeth, Christopher. "What Is Baby Reindeer? The True Story and New Series Explained". Netflix Tudum. Geargiveer vanaf die oorspronklike op 11 April 2024. Besoek op 11 April 2024.
- ↑ Stedman, Alex (6 Junie 2024). "Baby Reindeer's 'Real Martha' Hits Netflix With $170 Million Defamation Lawsuit". IGN (in Engels). Besoek op 20 Julie 2024.
- ↑ Kroll, Justin (23 April 2024). "'Baby Reindeer' Creator And Star Richard Gadd Signs With UTA". Deadline (in Engels (VSA)). Besoek op 20 Julie 2024.
- ↑ "Baby Reindeer Star Nava Mau Offers A Different Take On The Smash Netflix Series". HuffPost UK (in Engels). 11 Mei 2024. Besoek op 20 Julie 2024.
- ↑ Li, Shirley (15 Mei 2024). "The 'Baby Reindeer' Mess Was Inevitable". The Atlantic (in Engels). Besoek op 20 Julie 2024.
- ↑ Shaw, Vicky (6 Mei 2024). "Baby Reindeer success comes amid jump in subscription spending – Barclays". The Independent (in Engels). Besoek op 20 Julie 2024.
- ↑ "Baby Reindeer: Limited Series". Rotten Tomatoes. Geargiveer vanaf die oorspronklike op 23 April 2024. Besoek op 20 Mei 2024.
- ↑ "Netflix Global Top 10". Netflix. 14 April 2024. Besoek op 30 April 2024.
- ↑ "Netflix Global Top 10". Netflix. 21 April 2024. Besoek op 30 April 2024.
- ↑ "Netflix Global Top 10". Netflix. 28 April 2024. Besoek op 16 Mei 2024.
- ↑ "Netflix Global Top 10". Netflix. 5 Mei 2024. Besoek op 16 Mei 2024.
- ↑ Wiseman, Andreas (9 Desember 2024). "Golden Globes Nominations Full List Revealed: 'Emilia Pérez' Leads In Film & 'The Bear' Leads TV". Deadline Hollywood. Geargiveer vanaf die oorspronklike op 9 Desember 2024. Besoek op 10 Desember 2024.
- ↑ "Baby Reindeer". Academy of Television Arts & Sciences. 17 Julie 2024. Besoek op 17 Julie 2024.
- ↑ White, Peter (17 Julie 2024). "Netflix Leads Total Emmy Nominations But FX Comes in Close Second with Record Haul Ahead of HBO". Deadline Hollywood. Besoek op 17 Julie 2024.
