Beaumont Schoeman

B.M. (Beaumont) Schoeman (George, 12 Maart 1932 – 1985) was 'n Afrikaanse joernalis, onder andere redakteur van die Herstigte Nasionale Party se mondstuk, Die Afrikaner, en skrywer van talle boeke oor die Suid-Afrikaanse politiek.

Beaumont Schoeman is tydens die Groot Depressie op George gebore en het aan die Hoër Volkskool, Graaff-Reinet, gematrikuleer. Daarna het hy buitemuurs aan die Universiteit van Pretoria studeer en sy B.A. met geskiedenis en staatsleer as hoofvakke verwerf en daarna sy studie in geskiedenis aan die Universiteit van die Oranje-Vrystaat voortgesit.

Schoeman het sy joernalistieke loopbaan in 1953 by Die Volksblad in Bloemfontein begin en was daarna politieke verslaggewer vir die SAUK en politieke korrespondent van Die Vaderland en van Dagbreek. Hy het in die eerste redaksie van die Pretoriase middagblad Hoofstad as assistent-redakteur gedien met dié koerant se stigting in 1968. Dr. Andries Treurnicht was die eerste redakteur nadat hy by Die Kerkbode bedank het. Ná die stigting van die HNP in 1969 het Schoeman by Die Afrikaner aangesluit, waar hy eers onder hoofredakteurskap van dr. Willie Lubbe gewerk het. Met Lubbe se bedanking word hy redakteur en behartig dié koerant etlike jare lank byna eiehandig.

Schoeman het deurentyd boeke oor die politiek geskryf, onder meer Parlementêre verkiesings in Suid-Afrika, 1910-1976 (1977), Die Geldmag: SA se onsigbare regering (1980), Die Broederbond in die Afrikaner-politiek (1982), Van Malan tot Verwoerd (1973), Vorster se 1000 dae (1974), en Die sluipmoord op dr. Verwoerd (1975). Vroeër het hy onder die skuilnaam Louis Naude die boek Dr. A. Hertzog, die mynwerker en die Nasionale Party (1969) geskryf. (Dr. Albert Hertzog was die HNP se eerste leier.)

Ná sy uittrede by Die Afrikaner omstreeks 1984 het hy kortstondig sakeman geword en sterf in die tuig by Finansies & Tegniek, waar hy tot sy skielike dood 'n agterkamerwerk as eindredakteur met gebruiklike ywer verrig het.

Bronne

(af) Mediamense.co.za Geargiveer 7 November 2016 op Wayback Machine. URL besoek op 7 November 2016.