Bessie Kotzé

Bessie Kotzé is ’n Afrikaanse skrywer wat veral bekendheid verwerf vir haar kinderversies en kinderverhale.

Lewe en werk

Bessie Badenhorst is in die distrik Vredefort gebore, waar haar vader, Henry Badenhorst, skoolhoof was. Sy matrikuleer aan Vredefort Hoërskool en studeer dan verder aan die Universiteit van die Oranje-Vrystaat en die Bloemfontein Onderwyskollege. Hier kwalifiseer sy as onderwyser en gee dan vanaf 1941 vir ’n ruk klas aan die Model Laerskool in Bloemfontein.

Vir Die Huisvrou skryf sy vir lank ’n gereelde rubriek onder die titel Hier gesien en daar gehoor, terwyl sy ook aktief deelneem aan amateur drama vir Die Bloemfontein Teatergroep. Sy is aan die einde van 1943 getroud met Wilhelm de V. Kotzé van Bloemfontein. Hulle het twee kinders, ’n seun en ’n dogter.

Skryfwerk

Skryfwerk vir kinders en die jeug

Tydens haar jare van onderwys aan klein kinders vind sy dat daar ’n groot tekort aan toepaslike werke vir Afrikaanse kinders is en sy begin self gediggies en stories skryf om die leemte aan te vul. Van haar kinderverse word opgeneem in onder andere Nuwe Kleinverseboek en Nuwe Kleuterverseboek.

Sy skryf ook die kindertoneelstukkie Die stout klein dwergie, wat een van drie toneelstukkies van haar is wat opgeneem word in Die kleinspan op die planke.

Vir hoërskoolleerlinge skryf sy die libretto vir die operette Die blink kristal .

Kerneelsie en Mafarie-mier is in 1992 ’n naaswenner van die ATKV-Kinderboekprys vir ouderdomsgroep 8-9 jaar.

Skryfwerk vir volwassenes

Sy skryf ook dramas vir volwassenes en twee van haar vollengte dramas, Pienk angeliere en Die lot (laasgenoemde gepubliseer deur Dalro) en ’n eenbedryf (Twee stoele) word opgevoer deur Die Bloemfontein Teatergroep onder leiding van Maria Bosman en Mariechen Naudé. Twee stoele verower ook die eerste prys in ’n dramawedstryd. Springbokradio saai een van haar radiodramas uit en haar sketse word deur Vrouerubriek van die Afrikaanse diens van die Suid-Afrikaanse Uitsaaikorporasie (SAUK) uitgesaai.

 Publikasies

Werke wat uit haar pen verskyn sluit in:

Jaar	Publikasies
1947	Resitasies vir Grietjies en Klasies
1948	In Feëland
	Die Kabouters van Kattekwaad-land, en die Prinses met die goue hare
1950	Neutvars versies vir die kleinspan
	Versies vir die kleinspan
	Die ys-paleis en Die mensvreterboom
1955	Kleuterklontjies
1961	Die kleinspan op die planke: Drie toneelstukkies
1964	Gertjie in Mierland
1968	Die lot
1976	Orlapant die Olifant en ander versies
1991	Kerneelsie en Mafarie-mier

Bronnelys

Boeke

• Nienaber, P.J.; Senekal, J.H en Bothma, T.C. Mylpale in die geskiedenis van die Afrikaanse letterkunde. Afrikaanse Pers-Boekhandel. Tweede hersiene uitgawe, 1963.