Blin

in Wikipedia, die vrye ensiklopedie
(Aangestuur vanaf Blini)
Spring na: navigasie, soek
Blin, blintsjik
’n Bord met blini, ook genoem blintsjiki.
’n Bord met blini, ook genoem blintsjiki.
Soort gereg Pannekoek
Land Rusland
Hoofbestanddeel Meel
Ander bestanddele Melk, eiers, suiker
Soortgelyke geregte Plaatkoekie, crêpe, flapjack
Die bereiding van blini.

’n Blin (meervoud: blini; Russies: блин, блины; verkleinwoord: блинчик, blintsjik) is ’n soort Russiese pannekoek wat tradisioneel van koring- of (al hoe minder) van bokwietmeel gemaak en saam met suurroom, dikmelkkaas, botter, kaviaar en ander bykosse voorgesit word.[1]

'n Russiese 8-roebel-seël met blini en kaviaar.

In Russies is blin die enkelvoud en blini die meervoud, maar omdat die enkelvoud so selde voorkom, gebruik baie mense in ander tale die woord "blini" vir die enkelvoud. Die Afrikaanse (dubbele) meervoud is dan "blini's". Soms word die verkleinwoord, blintsjik(i), gebruik. Die Russiese woord kom van die Oudrussiese млинъ (mlin).[2] Dit het oorspronklik ’n gereg van gemaalde meel beteken, afgelei van die Oekraïense term mlin vir "meul" en vandaar die Oekraïense woord млинець (mlinets) vir blin.

Die Joodse blintz het blykbaar uit die blin ontstaan. Dit is ’n dun pannekoekie wat gewoonlik van koringmeel gemaak en om ’n vulsel van kaas of vrugte gevou word. Dit word dan weer gebraai of gebak.[3]

Geskiedenis[wysig | wysig bron]

Die vroeë Slawiërs in voor-Christelike tye het blini as ’n simbool van die son beskou vanweë hul ronde vorm en goue kleur.[4] Hulle is tradisioneel aan die einde van die winter gebak om die geboorte van die nuwe son te vier; dit is "Botterweek" (Maslenitsa) of "pannekoekweek" genoem.[4] Die viering is deur die Oosters-Ortodokse Kerk in ’n godsdiensfees verander en word vandag steeds gehou. Blini word egter nie as ’n rituele kossoort beskou nie en kan enige tyd geëet word.

Tradisionele Russiese blini word gemaak met ’n gegiste deeg wat gelos word om te rys en dan met melk, suurmelk, koue of kookwater verdun word. Wanneer kookwater gebruik word, word dit ook заварные блини (zawarnije blini, "vlapannekoeke") genoem. ’n Ligter, dunner pannekoek wat van ongegiste deeg gemaak word (gewoonlik van meel, eiers, melk, kefir of ander suurmelk), is ook algemeen. Blini is tradisioneel in ’n Russiese oond gebak, maar word deesdae meestal in ’n pan gebraai. Enige soort meel kan gebruik word, maar koringmeel is tans die gewildste.

Blini kom ook in die Joodse kookkuns voor. Hoewel dit in Judaïsme met geen godsdiensfees verbind word nie, word hulle dikwels op vakansiedae met ’n kaasvulsel in olie gebraai. Blintze kry gewoonlik ’n vulsel as hulle ’n tweede keer gebraai word, maar kan ook sonder ’n tweede braai met ’n vulsel geëet word; andersins word hulle gevou en saam met ’n doopsous genuttig. Vulsels sluit in sjokolade, sampioene, vleis, fynaartappel, kaviaar en kaas.

Soorte[wysig | wysig bron]

Blintze.

Van die verskillende maniere waarop blini berei kan word, is:

  • Gemaak van deeg wat enigeen of ’n kombinasie van gerasperde aartappels, appels en rosyne bevat.[4] Sulke blini is algemeen in Oos- en Sentraal-Europa.
  • Bedek met botter, suurroom, konfyt, heuning of kaviaar. Hulle kan gevou of opgerol wees met soet of sout vulsels soos vrugte, bessies, fynaartappel, maalvleis, hoender, eiers of fyn gekapte sampioene.
  • Deur ’n laag gekapte groente, vleis of sampioene in ’n pan met die deeg te bedek.
  • Blintze kry vulsels soos konfyt, vrugte, aartappel, maaskaas, maalvleis, hoender, sampioene, boontjiespruite, kool en/of uie. Die vulsel word in ’n vooraf gebraaide pannekoek toegerol en weer liggies gebraai of gebak. Sulke blintze word in Oekraïens ook налисники (nalisniki) en in Pools krokiety genoem.
  • Bokwiet-blini was tradisioneel gewild.[4] Hulle word veral nog aangetref in Oekraïne[4] asook in Litaue se Dzūkija-streek, die enigste deel van die land waar bokwiet verbou word. Hier word die pannekoeke grikių blynai genoem.

Verwysings[wysig | wysig bron]

  1. Photographic image”. (JPG) URL besoek op 2017-01-06.
  2. близорукий блинд. “блин - это... Что такое блин?”. URL besoek op 2017-01-06.
  3. blintze | a thin usually wheat-flour pancake folded to form a casing (as for cheese or fruit) and then sautéed or baked”. URL besoek op 2015-08-12.
  4. 4,0 4,1 4,2 4,3 4,4 Marks, Gil (2010). Encyclopedia of Jewish Food. Wiley. p. 56–58. Besoek op 18 April 2012.  ISBN 9780470391303

Eksterne skakels[wysig | wysig bron]