C.H. Mitchellbrug

Die C.H. Mitchellbrug (ook bekend as die Mtamvunabrug) is 'n motorbrug oor die Mtamvunarivier op die R61-provinsiale pad wat die Oos-Kaap met KwaZulu-Natal verbind.

Vanaf 1943 was die oorgang oor die rivier met 'n pont totdat die brug in 1966 gebou is. Die brug is by 31° 4′ 31.4″ suid en 30° 11′ 33.8″ oos, net suid van Port Edward en digby die Wildekus-kasino. Dit verbind die Hibiskuskus met die Wildekus.

Hierdie staalboogbrug het 'n oorspanning van 206 m, 'n lengte van 210 m en is 30 m bo die watervlak. Ten tye van sy ingebruikname was dit die langste hangbrug in die land. Dit dra die naam van 'n plaaslike politikus.

In die jare 2000 en 2001 is ingrypende onderhoudswerk aan die brug uitgevoer. Op 27 November 2002 het die brug in 'n sabotasieaanval deur verregses ernstige skade opgedoen.

Bibliografie

• Challenging bridge repairs earn a commendation. In “Civil Engineering”, Februarie 2007 (op internet)