Charl Wynand Malan

Genl. J.B.M. Hertzog se Nasionale Party het in 1929 alleen 'n volstrekte meerderheid behaal, maar nietemin weer twee Arbeiders in sy kabinet ingelsuit. Kol. Frederick Hugh Page Cresswell sit voor links langs dr. D.F. Malan, genl. Hertzog, N.C. Havenga em P. Grobler. Agter staan Oswald Pirow, genl. Jan Kemp, A. Fourie, S. Jansen, H. Sampson en Charles Wynand Malan.

Charles Wynand Malan was 'n leidende figuur in die Kaapse politiek in die eerste derde van die 20ste eeu.

Hy is op 9 Augustus1883 in die Paarl gebore. Hy was die negende seun van D.G. Malan, wat in die Kaapse politiek 'n belangrike rol gespeel het as voorsitter van die Paarlse tak van die Afrikanerbond. Hy het opleiding in die regte aan die Victoria-kollege op Stellenbosch ontvang. Hy was een van die stigterslede van die Kaaplandse Nasionale Party. In 1915 is hy verkies tot lid van die Volksraad vir Humansdorp, waar hy as prokureur gepraktiseer het, en verteenwoordig dié kiesafdeling tot en met sy dood. Hy was organiserende sekretaris van die Kaaplandse Nasionale Party van 1919 tot 1924. In daardie jaar word hy minister van spoorweë en hawens in genl. J.B.M. Hertzog se eerste kabinet, 'n pos wat hy tot sy dood beklee.

Hy sterf in 1933 op die ouderdom van 49 jaar.

Bronne

• Rosenthal, Eric, Encyclopaedia of Southern Africa, Juta and Company Limited, Kaapstad en Johannesburg, 1978.