Charlotte
Die Britse troepeskip Charlotte het op 20 September 1854 in Algoabaai vergaan. Dit is een van die mees ontstellende skeepsrampe van Suider-Afrika, veral omdat dit hoofsaaklik te wyte was aan die gebrek aan hawegeriewe in Port Elizabeth.
Die driemaster van 450 ton en van hout is in 1844 in Liverpool gebou. Op 28 Junie 1854 het die skip met 163 soldate en 5 offisiere van die 27ste Regiment, 16 vroue en 29 kinders as passasiers en 'n bemanning van 22 van Queenstown in Ierland na Calcutta in Indië vertrek.
Omdat die reis van Ierland na die Kaap weens die weersomstandighede heelwat langer geduur het as normaal, het kapt. Robert D. Affleck besluit om vir water en voedsel by Port Elizabeth vas te meer. Terwyl die skip in die hawe is, breek 'n geweldige storm los sodat twee van sy ankertoue en twee maste breek en die skip aan die onderpunt van Jettystraat op die rotse loop. Selfs 'n reddingsboot strand. Ook die baie skerp rotse het bygedra tot die lewensverlies van ongeveer 110 opvarendes. Dae lank het nog lyke in Algoabaai uitgespoel. Dit is die ergste skeepsramp wat in Port Elizabeth plaasgevind het.
Bibliografie
[wysig | wysig bron]- Burman, Jose: Strange shipwrecks of the southern seas. Kaapstad: Struik, 1968.
- Turner, Malcolm: Shipwrecks and salvage in South Africa – 1505 to the present. Kaapstad: Struik, 1988. ISBN 0-86977-387-9
- www.pdavis.nl/Charlotte