Christus die Verlosser

in Wikipedia, die vrye ensiklopedie
Christus die Verlosser
Standbeeld van Christus die Verlosser wat oor Rio de Janeiro uittroon.
Standbeeld van Christus die Verlosser wat oor Rio de Janeiro uittroon.
Land Vlag van Brasilië Brasilië
Onthul 12 Oktober 1931
Plek Rio de Janeiro, Brasilië
Ontwerp Heitor da Silva Costa
Vervaardig Paul Landowski

Christus die Verlosser (Portugees: Cristo Redentor) is 'n groot standbeeld van Jesus Christus in die wyk Alto da Boa Vista in die stad Rio de Janeiro in Brasilië. Die beeld is 38 meter hoog en staan op die 710 meter hoë Corcovado-berg, wat oor die stad uitkyk. Van 1931 tot 2010 was dit die grootste Art Deco-standbeeld ter wêreld.

Geskiedenis[wysig | wysig bron]

Hoof van Christus die Verlosser

Die idee vir die standbeeld dateer uit 1850 en kom van die Katolieke priester Pedro Maria Boss. Hy vra koningin Isabel om dit te finansier, maar sy is nie daarvoor te vinde nie. In 1889 word die projek finaal afgelas, nadat Brasilië 'n republiek geword en die nuwe wette bepaal het dat die kerk en staat geskei moet bly.

In 1921 kry die kerk van Rio de Janeiro dit reg om nuwe lewe in die plan te blaas. Hulle organiseer 'n Semana do Monumento ("Monumenteweek") om geld in te samel sodat die monument tog verwesenlik kan word.

Op 12 Oktober 1931, na 9 jaar se werk, was die monument gereed en is dit in 'n uitgebreide seremonie deur president Getúlio Vargas ingewy. Een van die beplande hoogtepunte was die aanskakel van die beligting. Dit sou deur Guglielmo Marconi vanaf sy seiljag gedoen word, maar as gevolg van slegte weer moes arbeiders op die berg die beligting met die hand aanskakel.

Die monument weeg 1 145 ton, het 'n hoogte van 38 meter en die spanbreedte tussen die twee arms is 28 meter. Die beeld is deur ingenieur Heitor da Silva Costa ontwerp en in Frankryk deur die Frans-Poolse beeldhouer Paul Landowski gebou, waarna dit in blokke van 16 ton na Brasilië verskeep is.

Toegang[wysig | wysig bron]

Christus die Verlosser op die Corcovado-berg

'n Tandrat-baan, die Corcovado Rack Railway, klim van die Floresta da Tijuca tot reg onder die standbeeld. Die tog duur 20 minute. Die berg kan ook per motor bestyg word. Daarna moet 'n verdere 222 tree geklim word, wat aan die einde van die tandrat-baan se stasie begin. Die beeld kan deesdae ook met een van die drie hysbakke of die vier roltrappe bereik word.

Interessante feite[wysig | wysig bron]

  • In 2007 is dié Christusbeeld as een van die Sewe Nuwe Wonders van die wêreld aangewys.
  • As gevolg van aardverskuiwings na hewige reënval is die standbeeld in April 2010 vir die eerste keer sedert sy inhuldiging vir die publiek gesluit.[1]
  • Op 17 Januarie 2014 is 'n vinger van die standbeeld deur 'n bliksemstraal beskadig.[2]

Verwysings[wysig | wysig bron]

Eksterne skakels[wysig | wysig bron]

Koördinate: 22°57′6.37″S 43°12′37.75″W / 22.9517694°S 43.2104861°W / -22.9517694; -43.2104861