D.M. Greeff
 | Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Daniel Michiel Greeff is ’n Afrikaanse skrywer van streekverhale oor die Noordweste.
Lewe en werk[wysig | wysig bron]
Daniel Michiel Greeff is op 4 Augustus 1937 op Onseepkans gebore. Hy behaal sy matriek en sy B.A.-graad deur korrespondensie en kry daarna ’n B.A. Honneurs-graad in Biblioteekkunde aan die Universiteit van Pretoria. Daarna aanvaar hy ’n betrekking as bibliotekaris by die Universiteit van Suid-Afrika.
Skryfwerk[wysig | wysig bron]
Hy publiseer geruime tyd in Contrast, Standpunte, Sestiger en Tydskrif vir Letterkunde eksperimentele prosas en gedigte voordat hy in 1970 met “Klip in die slingerpad” debuteer. Sy verhale staan in die teken van die kontreikuns, speel in die droë Noordweste af en word deur sy verteller Oom Hennerik Vermaak van Verneukdraai in die Noordweste vertel. Hierdie verteller herinner aan Oom Schalk Lourens van Herman Charles Bosman. Hy het net standerd drie, maar Oom Hennerik is ’n filosoof wat deur die lewe self geskoei is en ’n fyn sin vir humor besit. In[1] “Klip in die slingerpad”[2] vertel Oom Hennerik sy verhale aan die jong man Hansie, ’n student wat tydens die langvakansie by Oom Hennerik se dogter Marietjie op die plaas kuier.[3] Die jong man kom deur die verhale agter dat hy nie die eerste een is wat daar kuier nie en baie waarskynlik ook nie die laaste nie, al is die verhouding nie die sentrale tema van die verhale nie. Oom Hennerik vertel van Schalk wat Kleinwillem se kitaar stukkend slaan omdat dié te vriendelik is met sy vrou, van Hans Karsten se dogtertjie wat van ’n afgrond afval, van Tant Hendrina wat gif drink wanneer haar man saam met Wilmien berg toe gaan om heuning uit te haal en van baie meer plaaslike karakters. Elke storie eindig met ’n verrassende knoop aan die einde.[4] “Die horing wat groei” en “Oom Hennerik Vermaak word verbrand” is verdere bundels in dieselfde trant. Sy kortverhaal “Ou Dominee se broer” word deur Abraham H. de Vries opgeneem in die versamelbundel “Uit die kontreie vandaan”. Hierin leer die dominee sy broer Abel se skelmstreke so goed ken dat hy eindelik self in die tronk beland. Vir jong kinders skryf hy Loewie en die leeu” (met illustrasies deur Alida Carpenter) wat ook in Engels uitgegee word as “Lester and the lion”. Hierdie boek verower in 1990 die eerste prys in Daan Retief Uitgewers se Kleuterverhaalwedstryd. Hy lewer ook artikels en ander bydraes vir die Nederlandse letterkundige tydskrif Ons Erfdeel.
Publikasies [wysig | wysig bron]
| Jaar | Publikasies |
|---|---|
| 1970 | Klip in die slingerpad |
| 1974 | Die horing wat groei |
| 1975 | Oom Hennerik Vermaak word verbrand |
| 1991 | Loewie en die Leeu |
Bronnelys[wysig | wysig bron]
Boeke[wysig | wysig bron]
- Cloete, T.T. (red.) “Die Afrikaanse literatuur sedert sestig” Nasou Beperk Eerste uitgawe 1980
- Kannemeyer, J.C. “Geskiedenis van die Afrikaanse literatuur 2” Academica, Pretoria, Kaapstad en Johannesburg Eerste uitgawe Eerste druk 1983
- Van Coller, H.P. (red.) “Perspektief en Profiel Deel I” J.L. van Schaik-Uitgewers Pretoria Eerste uitgawe 1998
Tydskrifte en koerante[wysig | wysig bron]
- Kloppers, Albert “Oor Pirow Bekker se bloemlesing ‘Om laaste te kan lag’” “Tydskrif vir Letterkunde”Jaargang 28 no. 3, Augustus 1990
Internet[wysig | wysig bron]
- Digitale Bibliotheek voor Nederlandse Letteren: http://www.dbnl.org/auteurs/auteur.php?id=gree027
- Esaach: http://www.esaach.org.za/index.php?title=Greeff,_D.M.
- Venter, L.S. Volksblad: http://152.111.11.6/argief/berigte/volksblad/2000/05/29/8/4.html[dooie skakel]
- Worldcat: http://www.worldcat.org/identities/lccn-no2002-27973/