Druskininkai [ˈd̪rʊs̪ʲkʲɪn̪ʲɪŋkɐɪ] luister(hulp·inligting) is die grootste en bekendste mineraalbad- en ontspanningsoord van Litaue en die administratiewe sentrum van die gelyknamige munisipaliteit, Druskininkų savivaldybė. Die stad, wat aan die Nemunasrivier in die suide van die land naby die grens met Pole en Wit-Rusland geleë is, het sy vars en gesonde lug aan sy ligging temidde van 'n uitgestrekte bosgebied te danke, maar dit was hoofsaaklik sy natrium-kalsium-chloried-mineraalwaterbronne wat van Druskininkai reeds in die 19de eeu 'n gewilde badoord gemaak het. Die mineraalwater word sowel vir natuurlike gesondheidsbehandelings asook as drinkwater gebruik. 'n Plaaslike onderneming, UAB Druskininkų Rasa, vervaardig gebottelde mineraalwater.