E-boekleser

in Wikipedia, die vrye ensiklopedie
Spring na: navigasie, soek
'n E-boekleser met sy kenmerkende elektroniese ink-skerm
Drie generasies van Amazon se Kindle-e-boekleser: Kindle 2, Kindle 3 en Kindle 4

'n E-boekleser (dikwels ook kort e-leser of e-boektoestel genoem) is 'n mobiele elektroniese toestel wat veral ontwerp is om elektroniese boeke, dagblaaie en tydskrifte te lees.

E-boeklesers is so dun, klein en lig soos tabletrekenaars sodat hulle maklik in 'n tas saamgedra kan word. Tabletrekenaars en e-boeklesers verskil nogtans ten opsigte van hul aanraak-skerms. Die eersgenoemdes het gewoonlik skerms met 'n hoë verfristempo wat hulle meer geskik vir interaksie maak. Tabletrekenaars is daarnaas vir 'n wyer verskeidenheid inhoude ontwerp.

Die meeste e-boeklesers is daarenteen met swart-en-wit-skerms toegerus wat die voorkoms van gedrukte letters naboots - sogenaamde elektroniese papier of elektroniese ink. Hierdie gespesialiseerde skerms kombineer lae energieverbruik (slegs wanneer 'n mens bladsye omblaai word energie verbruik) met 'n relatief hoë kontras wat leesbaarheid selfs in helder sonlig vergemaklik. Elektroniese boeke, tydskrifte en koerante kan by aanlynwinkels gekoop en afgelaai of by biblioteke elektronies uitgeleen word.

E-boeklesers maak gewoonlik gebruik van spesiale lêerformate soos e-pub en mobi, terwyl ook ander formate soos byvoorbeeld PDF, HTML en TXT gelees kan word. Daar is nogtans steeds twee mededingende formate op die mark. Die Amerikaanse aanlynwinkel Amazon.com het vir sy Kindle-e-boekleser 'n eie formaat ontwikkel, terwyl die meeste Europese uitgewerye hul e-boeke tans in die e-pub-formaat aanbied. Die beskikbaarheid van titels in 'n bepaalde taal is dan ook afhanklik van die formaat wat op 'n nasionale mark beskikbaar is. Dikwels word spesiale sagteware benodig om 'n vreemde formaat te konverteer. In Oktober 2013 was daar reeds meer as 1 500 Afrikaanse e-boeke in die Kindle-formaat beskikbaar, alhoewel daar tans nog geen Suid-Afrikaanse filiaal van Amazon.com bestaan nie.

Sien ook[wysig]

Commons-logo.svg
Wikimedia Commons het meer media verwant aan:
E-boekleser (kategorie)