Falaise

in Wikipedia, die vrye ensiklopedie

Falaise

Kaart Wapen
Vlag
 Land Frankryk
 Région (gewes) Basse-Normandie
 Département Calvados
 Koördinate 48°53′N 11°31′O / 48.883°N 11.517°O / 48.883; 11.517
 Stigting 9de eeu
 Oppervlakte:  
 - Totaal 11,84 vk km
 Hoogte bo seevlak 145 m (89-188 m)
 Bevolking:  
 - Totaal (2008) 8 387
 - Bevolkingsdigtheid 708/vk km
 Tydsone UTC +1
 - Somertyd UTC +2
 Burgemeester Éric Macé
 Amptelike webwerf Falaise

Falaise is 'n Franse stad in die département Calvados van die administratiewe gewes Basse-Normandie, sowat 30 kilometer noord van Caen aan die Anterivier geleë wat hier diep in die gesteente ingesny het. Sy strategiese ligging is reeds deur die Franke raakgesien. Die stadsnaam is van Germaanse oorsprong en afgelei van die term falisa ("rots", vergelyk Duits Felsen).

Die plaaslike kasteel Château de Falaise is deur die Normandiese hertog Richard II, die grootvader van Willem die Veroweraar, vanaf omstreeks 1000 op een van Falaise se groot rotse opgerig. Die kasteel het grotendeels tot vandag toe bewaar gebly.

Willem die Veroweraar is die bekendste boorling van Falaise. Hy is in 1027 in die kasteel gebore en was steeds trou aan sy geboortestad waaraan hy 'n reeks voorregte, waaronder die markreg, toegeken het. Die handelskou in die voorstad Gulibray word sedert die 13de eeu gehou. In Willem se tyd het die plaaslike perdeveiling talle besoekers na Falaise gelok.

Die stad is in sy geskiedenis verskeie kere deur oorlogshandelinge geraak. Tydens die Honderdjarige Oorlog tussen Engeland en Frankryk is Falaise byna vyftig jaar lank beleër. In 1590 het die Franse koning Hendrik VI hier 'n oorwinning oor die Protestante behaal. In die Tweede Wêreldoorlog het die Duitse troepe, ná die geallieerde landing in Normandië in Junie 1944, van die Kanaalkus begin terugtrek. Falaise was regstreeks aan die frontlinie geleë en hulle het groot verliese gely.

Eksterne skakels[wysig | wysig bron]