For Whom the Bell Tolls

in Wikipedia, die vrye ensiklopedie
Jump to navigation Jump to search

For Whom the Bell Tolls (Vir wie die klok lui) is 'n roman gepubliseer in 1940, geskryf deur Ernest Hemingway.

Inhoud[wysig | wysig bron]

Die boek vertel die verhaal van Robert Jordan, 'n jong Amerikaanse plofstofkenner wat as lid van die Internasionale Brigades diens doen by 'n anti-fascistiese guerrilla-eenheid in die berge tydens die Spaanse Burgeroorlog. Saam moet hulle 'n brug opblaas om 'n aanval op Segovia te laat slaag. Jordan word tydens die sending verlief op Maria, wat haar ouers in die oorlog verloor.

Belangrike temas in die boek is die verskrikking van die moderne oorlogsvoering, eer, dood en selfmoord. Die sending kan ten beste omskryf word as 'n selfmoordsending. Die lede van die guerrilla groep word gekonfronteer met anonieme vyande in vliegtuie en tenks.

Die boek bevat outobiografiese gedeeltes: in 1937 en 1938 reis Hemingway vier keer na Spanje om as korrespondent vir die North American Newspaper Alliance (NANA) oor die burgeroorlog verslag te doen. Die hoofkarakter baseer hy waarskynlik op Robert Hale Merriman, 'n Amerikaner wat in 1938 in Spanje gesneuwel het. Merriman was 'n kennis van Hemingway. Net soos Merriman is sy romanheld Robert Jordan 'n kollegedosent in die Verenigde State en 'n vrywilliger wat veg aan die kant van die republikeine; en net soos Merriman verdwyn hy aan die einde van die oorlog agter vyandige linies. Hemingway gebruik ook 'n deel van sy eie familiegeskiedenis vir die verhaal en vir die karaktersketsing van die hoofkarakter, wanneer Jordan aan die einde van die boek terugdink aan die selfmoord van sy vader.

Verfilming[wysig | wysig bron]

Gary Cooper as Robert Jordan

Hemingway het die boek in 1939 in Kuba en Key West in Florida geskryf. Dit is in 1940 uitgegee. In 1943, toe die VSA betrokke was in die Tweede Wêreldoorlog, is dit verfilm deur Sam Wood met Gary Cooper as Robert Jordan en Ingrid Bergman as Maria.

Waardering[wysig | wysig bron]

For Whom the Bell Tolls word as deel van die wêreldliteratuur beskou en is in 1999 opgeneem in Le Monde se 100 boeke van die eeu-lys.

Bron[wysig | wysig bron]

  • Hierdie artikel is vertaal vanuit die Nederlandse Wikipedia