Gebruikerbespreking:DBdt

Jou wysigings aan energie verwys. Wat is die verskil tussen hitte en warmte, en hoekom word warmte bo hitte verkies? K175 (kontak) 11:51, 8 November 2017 (UTC)

Antwoord

Ek kan nie onmiddelik 'n onderskeidende rede verskaf nie, maar verlaat my op twee formele en gevestigde gebruike van warmte i.p.v. hitte in Fisika waarvan ek bewus is.

1. Die term warmte, en nie hitte nie, word deurlopend gebruik in hierdie Afrikaanse, Universiteitsvlak Fisika handboek:

  Van Staden, Swanepoel en Koen. Fisika. JL Van Schaik Uitgewers. Eerste uitgawe. 1992. (1 046 bladsye). ISBN 0 627 01787 8

(Dis 'n Fisika I handboek met ekwivalente inhoud van Sears, Zemansky en Young se "University Physics")

Die drie outeurs was onderskeidelik dosente aan die Universiteit Pretoria, RAU en Universiteit Stellenbosch. Die handboek is saamgestel op inisiatief van die SA Akademie vir Wetenskap en Kuns en die outeurs gee erkenning aan aanbevelings van dosente van ander universiteite. Die voorwoord is geskryf deur Dr Louw Alberts, eertydse voorsitter van die Akademie.

Ek's oortuig die outeurs eenstemmige gebruik van die term warmte reflekteer die aanvaarde gebruik daarvan by minstens daardie drie Afrikaanse universiteite. Die handboek gebruik hitte nêrens, nie eers as () verduideliking/alternatief vir warmte nie.

Ek haal gedeeltes aan uit Fisika ter illustrasie: (Kursiewe dele in o.s. uittreksels is verbatim uit Fisika)

AFDELING II: WARMTE (p351)

"Warmteleer is die studie van die transport van energie" (p352)

"Die fundamentele begrippe van die termodinamika is temperatuur en warmte " (Hfst 15. p353)

Hfst 17. Warmte (p376)

17-1 Eerste wet van die termodinamika (p377)

(ii) "Aangesien warmte en interne energie albei vorme van energie is, sal hulle dieselfde eenheid as energie, nl. joule (J), hê."

17-2 Spesifieke warmtekapasiteit (p379)

"Warmte toegevoeg = (Toename in interne energie) + (Arbeid verrig)" (p382) "Algebraiëse som van alle warmte = 0" (p386)

17-5 Faseverandering en oorgangswarmte. (p387)

Hfst 18. Warmte oordrag (p398)

(Die res van die hoofstuk gebruik egter warmte-oordrag.)

2. In al ons Fisika modules aan die destydse PU vir CHO (mid-1980s), veral in derdejaar Termodinamika, is warmte deurlopend gebruik. Al ons Fisikadosente, o.a. Proff. Harm Moraal, Piet Stoker, Christo Raubenheimer, Marius Potgieter e.a., het beklemtoon dat warmte, en nie hitte nie, die korrekte term is. Hoewel Engelse handboeke gebruik is, het ons Afrikaanse diktate deurlopend warmte gebruik.

Ek is gevolglik bewus van vier Afrikaanse universiteite waar die term warmte, en nie hitte nie, formeel in die Fisika gebruik is. Ek is oortuig dat alle outeurs en dosente wat dit so aan ons voorgehou het 'n goedberedeneerde rede daarvoor gehad het.

Regso. Ek het jou wysigings herstel. K175 (kontak) 10:28, 9 November 2017 (UTC)