Gereformeerde kerk Toekomsrus
 | Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
| Gereformeerde kerk Toekomsrus | ||
| ||
| Sluit in | Toekomsrus Wes-Rand | |
| Klassis | Wesrand | |
| Huidige predikant(e) | Vakant | |
| Belydende lidmate | 65 | |
| Dooplidmate | 50 | |
| Adres | Plumstraat 13 Toekomsrus | |
| Geskiedenis | ||
| Stigtingsdatum | 1979 | |
| Eerste predikant | Geen | |
Die Gereformeerde kerk Toekomsrus is ’n gemeente van die Gereformeerde Kerke in Suid-Afrika aan die Wes-Rand van Gauteng waarvan die lidmate oorwegend bruin is. Die gemeente ressorteer onder die Klassis Wesrand. Einde 2015 was hier 65 belydende en 50 dooplidmate. In sy hele bestaan het Toekomsrus nog nooit ’n eie predikant of selfs een in kombinasie gehad nie.
Die gemeente is in 1979 gestig en in die eerste twee jaar van sy bestaan is dienste in die saal van ’n plaaslike laerskool gehou. Twee erwe is van die stadsraad bekom en reeds van die stigting af het die gemeente begin beplan aan hul eie kerkgebou. Die kerkraad het self as bouaannemer opgetree en het soveel moontlik van lidmate se talente gebruik gemaak. Die beplanning was vir ’n doelmatige gebou, pleks van ’n sierlike.
Die gebou wat hulle opgerig het, bestaan inderwaarheid uit ’n pastorie sonder binnemure en bied sitplek aan 200 kerkgangers. Wanneer die finansies dit toelaat, wil die gemeente wel ’n regte kerkgebou oprig. Die agterste gedeelte van die gebou is as woonstel ingerig. Die ingebruikneming van die gebou het met ’n feestelike roetemars begin wat deur ’n blaasorkes gelei is. Dit het die trek van die gemeente van die laerskool af na die nuwe gebou voorgestel. By die gebou is ’n lint deurgeknip, die hoeksteen onthul en die deur amptelik oopgesluit. Daarna het prof. J.J.J. (Fika) van Rensburg ’n dankdiens gelei.
Bronne[wysig | wysig bron]
- (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
- (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
- (af) Vogel, Willem (red.). 2015. Die Almanak van die Gereformeerde Kerke in Suid-Afrika vir die jaar 2016. Potchefstroom: Administratiewe Buro.