Gutland

in Wikipedia, die vrye ensiklopedie
Gutland landskap naby Bech, (Echternach kanton).

Gutland (Frans: Bon Pays) is 'n streek wat die suidelike en sentrale dele van die Groothertogdom Luxemburg beslaan. Die Gutland (letterlik 'Goeie Land') beslaan 68% van die gebied van Luxemburg; noord van Gutland lê die Ösling, wat die oorblywende 32% van die Groothertogdom beslaan. In die ooste grens die Luxemburgse Gutland aan die Bitburger Gutland van Duitsland.

Gutland is nie 'n homogene streek nie, en bevat vyf substreke: die Vallei van die Sewe Kastele, Klein-Switserland, die Luxemburgse plato, die Moselvallei en die Red Lands. Ondanks die uiteenlopenheid daarvan, het Gutland wel algemene geografiese eienskappe, fisies sowel as menslik, wat dit van die Ösling onderskei. Dit is 'n vlakte met bosgebiede, klein riviere, weivelde, akkerland en wingerde, met 'n gemiddelde hoogte van 200 tot 300 meter bo seevlak.

Anders as die ylbevolkte Ösling, is Gutland relatief verstedelik. Terwyl die Ösling slegs een stad met 'n bevolking van meer as 2000 mense het, het Gutland vier stede met 'n bevolking van meer as 15 000 inwoners (Luxemburg Stad / Lëtzebuerg, Esch-sur-Alzette / Esch-Uelzecht, Differdange / Déifferdang en Dudelange / Diddeleng). Die Gutlandse stedelike gebiede is egter meestal in die kantons Esch-sur-Alzette (in Luxemburgs: Esch op der Uelzecht), Luxemburg (Lëtzebuerg), Capellen (dieselfde in Luxemburgs) en Mersch (Miersch), terwyl sommige ander dele van Gutland (die kantons Redange-sur-Attert / Réiden op der Atert, Echternach / Iechternach, Grewenmacher / Gréiwemaacher en Remich / Réimech) is amper so yl bevolk soos die Ösling-streek.

Die Gutland het 'n laer hoogte bo seespieël en 'n platter landskap as die Ösling. Geologies is die Gutland hoofsaaklik 'n groot Jura-Trias sandsteenformasie, wat deel uitmaak van die Lorraense stelsel; die Ösling is hoofsaaklik Devoon-skis en kwarts. Albei is bebos, maar die bosse van die Ösling is talryker en digter, 'n bewys van die stadiger tempo van menslike ontwikkeling in die Ösling. Die grootste deel van die Gutland is vrugbare landbougebied - vandaar die naam.

Die hoofstad Luxemburg lê in die Gutland.

Hierdie artikel is in sy geheel of gedeeltelik vanuit die Engelse Wikipedia vertaal.