Hein Kruger

in Wikipedia, die vrye ensiklopedie
Jump to navigation Jump to search
Ds. Hein Kruger
Ds. Hein Kruger
Ds. Hein Kruger

Naam Hendrik Gerhardus Kruger
Geboorte 26 Julie 1925
Springbokvlakte
Sterfte 27 Desember 2004 (op 79)
Kerkverband Gereformeerd
Gemeente(s) Vryburg 1960–'67, Ontdekkers 1967–'69, Brits 1969–'92
Jare aktief 1960–1992
Kweekskool Potchefstroom

Ds. Hendrik Gerhardus Kruger (Springbokvlakte, 26 Julie 1925Potchefstroom, 27 Desember 2004) was van 1960 tot 1992 predikant in drie gemeentes van die Gereformeerde Kerke in Suid-Afrika, waarvan die laaste 23 jaar in Brits.

Prof. P.J. de Bruin skryf in ds. Kruger se lewensberig in die Almanak vir die jaar 2006: "Om iets oor die lewe en werk van ds. Hein Kruger in die kerk van die Here en in die koninkryk van God te skryf is in 'n sekere sin nie maklik nie. Trouens, hoewel hy met soveel oorgawe en toewyding as dienskneg van die Here gewerk het en daar baie waardering was vir wat hy gedoen het, het hy afwysend gestaan teenoor dank en eer wat aan hom betoon word."

Herkoms en opleiding[wysig | wysig bron]

Hein Kryger het aan die Hoërskool Potgietersrus st. 8 voltooi en daarna gaan boer. Voor hy met sy teologiese studie begin het, het hy nog twee maal gaan boer. In 1950 is hy met Trienie Riekert van Pilanesberg getroud. Vanaf 1951 het hulle saam skoolgehou, eers naby Warmbad (Tvl.) en daarna twee jaar in Suidwes-Afrika. In dié tyd het hulle genoeg geld gespaar sodat Kruger vir sy studie in teologie kon betaal. Einde 1959 het hy die Th.B.-graad met onderskeiding verwerf.

Gemeentebediening[wysig | wysig bron]

Ds. Kruger en sy gesin. Sy vrou, Catharina Helena (née Riekert) sit tussen hul kinders (van links) is Ems, Sarel, Jan, Gert (agter) en Freek (voor).

Ds. Kruger het in sy bedieningstyd in die volgende kerke gedien: 1960 tot end 1966 in Vryburg; 1967 tot Augustus 1969 in Ontdekkers; September 1969 tot met sy emeritaat in 1992 in Brits. Hy was betrokke by die bou van vyf kerkgeboue – drie daarvan met die oog op sendingwerk – en verskeie pastorieë.

Prof. De Bruin skryf: "Al die aspekte van sy werk as predikant was vir hom uiters belangrik. Die uitdra van die Woord buite die plaaslike gemeente wat hy bedien het, het Hein gesien as 'n roeping van die Here. Daarom het hy baie ywerig daaraan meegedoen. Naas eredienste in die blanke kerke het hy die meeste Sondae self ook nog eredienste in sendingkerke waargeneem."

Ds. Kruger was 18 jaar lank lid van die dagbestuur van die kuratore van die Hammanskraalse Teologiese Skool. Sendingbewus soos hy was, het hy dié werk het hy met groot toewyding gedoen.

Gesinslewe[wysig | wysig bron]

Tussen ds. Kruger en sy gesin was daar 'n besonder sterk band. Sy vrou, Trienie, het hom getrou ondersteun en sy kinders het hoë agting en waardering vir hulle pa gehad, skryf prof. De Bruin. Dier gesin het met die jare talle groot beproewings ervaar. In 1982 het ds. Kruger van 'n tenkstaander afgeval en veral die linkerbeen en regtervoet ernstig beseer. In 1984 het hul oudste seun, Sarel, in 'n valskermongeluk gesterf en in 1986 het hul jongste seun, Freek, sy been verloor toe hy op 'n landmyn trap. Ondanks die beproewings, skryf prof. De Bruin, "het Hein so getrou as wat dit vir hom veral (liggaamlik) moontlik was met sy werk as predikant voortgegaan tot op die ouderdom van 67 jaar".

Vanaf 1997 het die egpaar in Huis Eikelaan op Potchefstroom gewoon tot met ds. Kruger se dood op 27 Desember 2004 ná 'n huweliksverbintenis van 54 jaar.

Waardering[wysig | wysig bron]

"Samevattend kan gesê word dat Hein 'n toegewyde dienskneg van die Here was," skryf prof. De Bruin. "Hy wou met sy hele lewe die Here en die kerk van die Here dien. In nederigheid en ootmoed het hy gebuig voor die gesag van God se Woord."

Bronne[wysig | wysig bron]

  • (af) De Kock, ds. Vasie in Vogel, ds. W. et al. 2006. Die Almanak van die Gereformeerde Kerke in Suid-Afrika vir die jaar 20074. Potchefstroom: Administratiewe Buro.