Hoërskool Grens

in Wikipedia, die vrye ensiklopedie
Jump to navigation Jump to search
Hoërskool Grens
Skoolwapen HS Grens.jpg
Leuse Bou!
Gestig 29 Januarie 1934
Tipe Staatskool
Hoof Mnr. J.D. du Plessis
Adjunkhoof(de) Me. L. Knickelbein
Stigter Theodore Goddefroy
Grade 8-12
Stad Oos-Londen
Provinsie Oos-Kaap
Land Suid-Afrika
Webblad hsgrens.com

Die Hoërskool Grens is die enigste Afrikaansmediumhoërskool in Oos-Londen, Oos-Kaap.

Geskiedenis[wysig | wysig bron]

Die destydse Kaaplandse onderwysdepartement het in 1933 goedkeuring verleen dat 'n Afrikaansmedium sekondêre skool in die stad met twee onderwysers kon begin. Dit was danksy die ywer vir moedertaalonderrig van ene mnr. T. Goddefroy. So ontstaan die Hoërskool Grens op 29 Januarie 1934 (in dieselfde maand as die Afrikaanse Hoërskool Nassau in Kaapstad) as Afrikaanse hoërskool in 'n oorwegend Engelse gebied.

Die skool se eerste tuiste, die ou gebou van die Frere-hospitaal, het die hoof, mnr. D.J. Rabie, aangespoor om die leuse "Bou" te kies. Die leerders kon self die wapen ontwerp en die wenpoging was dié van Calvyn Bothma.

In 1937 verhuis die skool na die ontruimde koshuis van die Hoër Meisieskool Clarendon en word daar reeds vir 'n koshuis beplan. Die skool koop verskeie geboue en huise aan om die toenemende aantal leerders van die omliggende distrikte te kan huisves.

In 1939 word die skool se ontoereikende geboue 'n ernstige probleem. Onderwysers moes selfs skoolhou in die konsistorie van die plaaslike NG gemeente. Die skool vra die onderwysdepartement om drie tente, maar die departement voorsien net twee. Eers ná die Tweede Wêreldoorlog, aan die einde van 1947, betrek Hoërskool Grens die ontruimde skoolgebou van die Hoër Meisieskool Clarendon , maar steeds was dit onvoldoende en met geen plek vir buitemuurse bedrywighede nie. So voer die skool weereens 'n stryd om sy eie, geskikte perseel.

In die derde kwartaal van 1959 marsjeer die skoolhoof, mnr. H.J. Groenewald, onder begeleiding van die kadetorkes, 22 personeellede en 480 leerders in 'n byna kilometer lange optog na die nuwe skoolgebou op die Baysville-bult, wat uitkyk oor die see. Teen dié tyd was die rugbyvelde al mooi groen, want mnre. J. Bence en C.P.F. Marais, het voor die tyd, met die hulp van die seuns, die gras aangeplant. Die koshuis was nog in aanbou. Mev. Rina Groenewald, die skoolhoof se vrou, is dié dag begeester om die nuwe skoollied se woorde te skryf: "Hoog op die heuwel waak jy oor die grense van ons land, van ons liefde . . ."

Daarna het die skool vinnig gegroei. Die stadsraad het teerpaaie om die skoolgebou aangelê en in 1961 is 'n derde rugbyveld voltooi. 'n Hokkieveld en atletiekbaan is ook aangelê. Die tennisbane en 'n swembad het later gevolg.

Bron[wysig | wysig bron]