Hohenheim, Parktown

in Wikipedia, die vrye ensiklopedie
Jump to navigation Jump to search
Hohenheim in 1899.
Portret van Florence Phillips, olie op doek, deur Antonio Mancini (1852–1930). In besit van die Johannesburgse Kunsmuseum. Sy en haar man, Lionel Phillips, was die eerste bewoners van Hohenheim.

Hohenheim was die eerste herehuis wat opgerig is nadat besluit is om Johannesburg se stadsgebied noordwaarts uit te brei en die voorstad Parktown te stig.

Sowat vyf jaar ná die aankoms in Johannesburg uit Kimberley van die egpaar sir Lionel en lady Florence Phillips het hulle die huis Hohenheim op die perseel van die huidige Charlotte Maxeke-hospitaal (vroeër die Johannesburgse Algemene Hospitaal) betrek, die eerste herewoning in Parktown. Frank Emley het dit in 1892 ontwerp (waarskynlik in opdrag van en met die insette van lady Florence) en twee jaar later is dit voltooi. Florence het Parktown se ontwikkeling voorgestel weens die lugbesoedeling in suidelike stadsdele waar mynbedrywighede 'n stofprobleem veroorsaak het.

Nadat Lionel Phillips uit die Zuid-Afrikaansche Republiek verban en die egpaar na Engeland uitgewyk het, het die skrywer en mynfinansier sir Percy Fitzpatrick die huis bewoon. Dis in 1972 gesloop om plek te maak vir die oprigting van die Johannesburgse hospitaal. 'n Erfenisplaket is aangebring om die plek aan te dui waar Parktown se eerste herehuis gestaan het, hoewel Marienhof (wat ook intussen gesloop is) reeds in 1890 opgerig is op 'n gedeelte van die plaas Braamfontein wat ook vandag binne Parktown se grense val. Van dié herehuis bly wel gedeeltes van die oorspronklike klipmuur en hekke oor.

Bronne[wysig | wysig bron]

  • (af) De Kock, W.J. en Krüger, prof. D.W. (hoofreds.). 1972. Suid-Afrikaanse Biografiese Woordeboek, deel II. Pretoria: Raad vir Geesteswetenskaplike Navorsing.
  • (af) Malan, D.G. (voorsitter: redaksiekomitee). 1986. Johannesburg eenhonderd jaar. Johannesburg: Chris van Rensburg Publikasies (Edms.) Beperk.
  • (en) Picton-Seymour, Désirée. 1989. Historical buildings in South Africa. Cape Town: Struikhof Publishers.
  • (en) Potgieter, D.J. (editor-in-chief). 1973. Standard Encyclopaedia of Southern Africa. Cape Town: Nasionale Opvoedkundige Uitgewery.
  • (af) Van der Waal, Gerhard-Mark. 1986. Van mynkamp tot metropolis. Die boukuns van Johannesburg, 1886–1940. Johannesburg: Chris van Rensburg Publikasies (Edms.) Beperk.

Sien ook[wysig | wysig bron]

Eksterne skakels[wysig | wysig bron]