JavaScript

in Wikipedia, die vrye ensiklopedie
Jump to navigation Jump to search
Nie-amptelike logo van JavaScript

JavaScript (JS) is 'n multiparadigma-programmeertaal wat verskeie style ondersteun, insluitend objekgeoriënteerde, funksionele, prototipegebaseerde en gebeurtenisgedrewe programmering. Die meerderheid webblaaiers gebruik en ondersteun die taal. Javascript laat webbladsye toe om interaktief op te tree (dit wil sê die bladsy verander gebaseerd op die gebruiker se toevoer of ander gebeurtenisse).

JavaScript word gereeld met die Java-programmeertaal verwar, veral omdat beide tale algemeen vir webtoepassings gebruik word. Alhoewel die tale sommige sintaktiese elemente deel (wat hulle ook in gemeen het met C, het JavaScript heelwat meer met funksionele programmeertale as met Java in gemeen.

Javascript is eers net gebruik deur webblaaiers maar is verder ontwikkel om ook werk vir die bediener te doen (veral deur Node.js).

Javascript Frameworks word ook nou gebruik vir statiese webblaaiers (deur biblioteke soos Angular, ReactJS en VueJS) as ook selfoon toepassings, deur gebruik van React Native.

Kenmerke van JavaScript[wysig | wysig bron]

Universele ondersteuning[wysig | wysig bron]

Alle moderne webblaaiers ondersteun Javascript. Voorheen moes gebruikers in die <script>-etiket aandui watter taal gebruik word, maar dit is nie meer nodig nie.

Taalstruktuur[wysig | wysig bron]

JavaScript ondersteun baie van die standaardstrukture vanuit C (if-stellings, while-lusse, switch-stellings ens.). Dit verskil wel wat die strekking (Engels: scope) van veranderlikes betref (met ander woorde waar in die kode veranderlikes/funksies sinvolle betekenis het). Soos in C is daar onderskeid tussen uitdrukkings en stellings.

Dinamiese datatipes[wysig | wysig bron]

JavaScript se veranderlikes se datatipes word dinamies toegeken. Die tipe word afgelei vanaf die waarde van 'n veranderlike eerder as 'n uitdrukking. Om 'n veranderlike gelyk te stel aan 'n getal en daarna aan 'n "karakterstring" is heeltemal geldig. Javascript ondersteun verskeie maniere om die datatipe van voorwerpe te bepaal, insluitend Duck Typing.

Sintaks[wysig | wysig bron]

Veranderlikes in JavaScript kan gedefineer word met die var, let of const sleutelwoorde.

var x; // Skep die veranderlike x en stel dit gelyk aan "undefined" 
var y = 2; //Skep die veranderlyke y en stel dit gelyk aan 2
var z = "Goodbye World!"; //Skep die veranderlike z en stel dit gelyk aan 'n string wat die karakters "Goodbye World!" bevat

Kommentaar in Javascript word aangedui met twee vorentoe skuinsstrepe.

Daar is geen ingeboude funksionaliteit vir toevoer/afvoer in JavaScript nie, aangesien die looptydomgewing dit voorsien.

Meeste looptydomgewings het 'n console-voorwerp waarmee afvoer gelewer kan word. Gewoonlik in webblaaiers kan gebruikers die console sien deur F12 te druk. Onder volg 'n basiese Hello World program in JavaScript.

console.log("Hello World!");

'n Eenvoudige rekursiewe funksie:

function faktoriaal (n) {
    if(n === 0) { 
        return 1; 
    }
    return n * faktoriaal(n - 1);
}
faktoriaal(3); //Sal 3 * 2 * 1 = 6 terugstuur

'n Anonieme funksie (of lambda):

function teller() {
    var telling = 0;
    return function() {
        return telling++;
    };
}

var closure = teller();
console.log(closure()); //Print 1 
console.log(closure()); //Print 2
console.log(closure()); //Print 3

Gebruik op webblaaie[wysig | wysig bron]

'n Minimale voorbeeld van 'n webblad wat JavaScript-kode (HTML 4.01-sintaks) bevat word hieronder vertoon:

<!DOCTYPE HTML PUBLIC "-//W3C//DTD HTML 4.01//EN" 
"http://www.w3.org/TR/html4/strict.dtd">
<html>
  <head><title>'n Eenvoudige bladsy</title></head>
  <body>
    <script type="text/javascript">
      document.write('Hallo wêreld!');
    </script>
    <noscript>
      <p>Jou webblaaier ondersteun nie JavaScript nie, of jy het dit afgeskakel.</p>
    </noscript>
  </body>
</html>

'n Voordeel van die gebruik van Javascript op 'n webbladsy is dat die gebruiker se webblaaier die werk doen, eerder as die bediener. Dit laat die webbladsy toe om te reageer op die gebruiker se toevoer. JavaScript kan meer gebruikeraksies waarneem as HTML, soos watter knoppies op die sleutelbord gedruk is.

Gebruik by Windows[wysig | wysig bron]

JavaScript kan ook op Windows uitgevoer word met die sogenaamde WSH (Windows Scripting Host). Daarvoor moet mens 'n .js-lêer skep en die program daarin skryf. Met 'n dubbelkliek kan die lêer uitgevoer word.

Sien ook[wysig | wysig bron]

Eksterne skakels[wysig | wysig bron]