AJAX

in Wikipedia, die vrye ensiklopedie
Self-voltooi, 'n toepassing van AJAX.

AJAX (Engels vir Asynchronous Javascript And XML) is 'n tegnologie wat gebruik word vir die ontwerp van interaktiewe webbladsye waarin gegewens asinchroon van 'n webbediener afgelaai kan word sonder dat die bladsy in sy geheel herlaai hoef te word. So 'n AJAX-bladsy kan vergelyk word met 'n applikasie wat in die webblaaier self hardloop. Die term, AJAX, is op 18 Februarie 2005 deur Jesse James Garrett bekendgestel en word deur groot maatskappye soos Google en Amazon erken.

Deur gebruik te maak van XMLHttpRequest hoef die webbladsy nie opnuut verfris te word om nuwe inhoud te kry nie. Google Suggest stel byvoorbeeld by elke sleuteldruk 'n nuwe reeks soekterme voor sonder dat mens die bladsy hoef te herlaai. Wikipedia se soekfunksie maak ook van die konsep gebruik en soekresultate word al voorgestel nadat slegs 'n paar karakters getik is.

AJAX is 'n manier om interaktiewe webapplikasies te ontwikkel deur 'n kombinasie van die volgende tegnieke te gebruik:

  • XHTML en CSS vir die presentasie volgens die W3C standaard.
  • Die Document Object Model vir die dinamiese vertoning van inligting en vir interaksie.
  • XML en XSLT vir die opstel, aanpassing en vervoer van gegewens. In sommige gevalle word dit vervang deur JSON (JavaScript Object Notation).
  • Die XMLHttpRequest-objek vir asinchrone kommunikasie met die bediener.
  • JavaScript om alles aan mekaar te bind.

Die skriptale waaruit AJAX saamgestel is bestaan al jare lank. AJAX, as 'n kombinasie van hierdie tale word moontlik met die koms van die XMLHttpRequest-objek (soos eerste ingevoer deur Microsoft in Internet Explorer 5) en die moontlikheid om die HTML-DOM-model te gebruik in Javascript (W3C-aanbeveling van 1998).

Die konsep dat 'n bladsy nie verfris hoef te word nie is ook nie nuut nie. Dit kon byvoorbeeld al met behulp van 'n versteekte HTML raam (HTML hidden frame) gedoen word. Daarteen was die grootste probleem dat data nie maklik tussen bladsye uitgeruil kon word nie. Die probleem is egter met die koms van AJAX opgelos, wat AJAX so gewild maak.

Ontwikkelingshulpmiddels[wysig | wysig bron]

Verskeie groepe het hulpmiddels ontwikkel om die skryf van AJAX-applikasies te vergemaklik. Byvoorbeeld, Microsoft het "ASP.NET AJAX" (http://ajax.asp.net) (kodenaam Atlas) ontwikkel as 'n plugin vir Visual Studio en Google het die Google Web Toolkit (http://code.google.com/webtoolkit/) ontwikkel. Daar is ook 'n groot aantal oopbron biblioteke en hulpmiddels beskikbaar, onder andere Scriptaculous (http://script.aculo.us/), DWR (http://getahead.org/dwr), jQuery (http://jquery.com/) en MooTools (http://mootools.net).

Sien ook[wysig | wysig bron]

Eksterne skakels[wysig | wysig bron]