Johann van der Sandt

in Wikipedia, die vrye ensiklopedie
Johannes Theodorus van der Sandt
Gebore
Johann van der Sandt

1966
Oranje-Vrystaat, Suid-Afrika
Alma materUniversiteit van Pretoria
Beroepkoordirigent en komponis

Johann van der Sandt (*1966) is ’n Suid -Afrikaanse musikus wat in die Vrystaat gebore is. Hy studeer aan die Universiteit van Pretoria[1] waar hy sy B.Mus. (Ed.), B.Mus. (Hons.), M.Mus. (Musiekwetenskap) en D.Mus. (koorleiding) behaal het, asook diploma’s in individuele musiekopvoeding in klavier, orrel, sangopleiding en klarinet.

Van der Sandt het as skoolseun in sy skoolkoor en in die Noord-Transvaalse Jeugkoor begin sing. Terwyl hy aan die Universiteit van Pretoria studeer, sing hy in die Universiteit van Pretoria Camerata. Hy woon gereeld oorsese meesterklasse en simposiums by.

In Januarie 1996 ontvang hy onder leiding van Joop Schets die diploma in koorleiding van die Instituut vir Dirigente-opleiding, Gorinchem (Nederland).[1]

Biografie[wysig | wysig bron]

Van der Sandt matrikuleer in 1984 aan die Hoërskool Voortrekkerhoogte in Pretoria. In 1985 skryf hy in vir studies aan die Universiteit van Pretoria waar hy in 1988 sy B.Mus. (Ed.) behaal. Die titel van sy finalejaarskripsie is “Die musiek van Hans Roosenschoon: ’n stylbespreking”. In 1989 behaal hy die B.Mus (Hons.)-graad en in 1991 die M.Mus. in musikologie aan dieselfde universiteit. Vir sy magistergraad skryf hy die verhandeling “Die sekulêre werke vir gemengde en a capella-koor van Josef Rheinberger (1839-1901)”. In 1996 behaal hy ’n diploma van die Instituut vir Dirigente-opleiding in Gorinchem (Nederland) en in 2013 word die graad D.Mus. van die Universiteit van Pretoria aan hom toegeken vir die verhandeling “Na ’n kurrikulum vir die opleiding van voorgraadse koorleidingstudente”.

In 1991 word Van der Sandt aangestel as lektor in musiekopvoedkunde aan die Vista-universiteit se Mamelodi-kampus. Hy beklee die pos tot 1995 toe hy aan die Randse Afrikaanse Universiteit aangestel word as lektor vir koormusiek en koorleiding. In 1999 aanvaar hy ’n pos as senior lektor aan die Universiteit van Pretoria in musiekopvoedkunde en gehooropleiding. Van der Sandt word in 2001 bevorder tot professor in koorleiding aan die UP en beklee hierdie pos tot Junie 2008 toe hy hom by die Drakensberg-seunskool aansluit as koorleier. In Junie 2012 verhuis Van der Sandt na Italië om ’n professoraat aan die Universiteit van Bolzano te aanvaar.

Hy was ook die stigterdirigent van die Singkronies Kamerkoor. Die doel van die koor is om ’n podium vir die werk van Suid-Afrikaanse komponiste te skep. Op hierdie manier poog die koor om ’n bydrae te lewer tot die argief van Suid-Afrikaanse koormusiek. Die koor is genomineer vir twee Suid-Afrikaanse musiektoekennings in die kategorie ‘Beste kooruitvoering’. Die koor het in 1998 die Suid-Afrikaanse musiekprys gewen vir hul opname van die gewyde a cappella-werke van die Stellenbosse komponis H. Pieter van der Westhuizen. In 2006 het Van der Sandt Can‘t’Afrika saamgestel, ’n sanggroep van 12 sangers wie se doel dit is om werke van Suid-Afrikaanse komponiste te bestudeer en op te voer.

Hy maak sy debuut as koordirigent in 1989 met die Impromptu Kamerkoor. Hy het ses jaar lank die Oos-Rand Jeugkoor gelei (1993-1997). In Julie 1994 neem die koor deel aan die 16de Béla Bartók-koorkompetisie, Hongarye, waar hulle die afdeling vir folklore wen en die 2de prys in die afdeling vir gemengde jeugkore ontvang het.

Van der Sandt is ook ’n komponis en is bekend vir sy koorverwerkings, uitgevoer deur nasionale en internasionale kore. Sy eerste publikasie, in samewerking met die komponis Niel van der Watt, is in Junie 1995 gepubliseer – African songbook for mixed choir. Onder sy artistieke leiding het die Duitse etiket Prospect die CD-reeks South African Choral Music bekendgestel.

Verwysings[wysig | wysig bron]

  1. 1,0 1,1 "Johannes Theodorus van der Sandt". www.unibz.it (in Engels (VK)). Besoek op 25 Augustus 2021.