Julien-Marie Crozet

in Wikipedia, die vrye ensiklopedie
Jump to navigation Jump to search

Julien-Marie Crozet (1728 - 1782), 'n seevaarder uit Port Louis, Mauritius, na wie die Crozeteilande vernoem is, word op 26 November 1728, as die oudste van 17 kinders van Joseph Crozet in Port Louis gebore. Na 'n kort skoolopleiding vertrek hy in September 1739, op 11 jarige ouderdom as pilotin, op die skip Maurepas na Pondichéry in Frans-Indië. Hy keer in Mei 1741 terug. In Desember 1742 vertrek hy vir twee jaar na China, steeds as pilotin, aan boord die Philibert. Van toe af spandeer hy meer en meer tyd op die see en begin hy die sporte van 'n vloot loopbaan klim.

Seeloopbaan[wysig | wysig bron]

In 1771 is hy as tweede in bevel op die Mascarin deel van die ontdekking van die Crozeteilande deur Marc-Joseph Marion du Fresne. Die ontdekking vorm deel van 'n reis vanaf Mauritius na Tahiti wat oorspronklik daarop gemik was om Ahu-toru, 'n Tahitiaan wat na Parys gebring is, terug te neem na Tahiti. Die skepe, die Mascarin en die Marquis de Castries, verlaat Port Louis in Oktober 1771. Die Tahitiaan sterf egter in Madagaskar van pokke en 'n suidelike rigting word ingeslaan. Marion-Dufresne en Julien Crozet, herontdek die Marion- en Prins Eduard-eilande voor hulle die Crozeteilande op 22 Januarie 1772 bereik. 'n In-besit-neemplegtigheid word op 24 Januarie op Île de la Possession gehou - Julien Crozet word aan wal gestuur waar hy die eilande in besit neem deur 'n bottel met 'n perkament in die naam van koning Louis XV neer te lê. Die eiland word Île de la Possession na aanleiding van die gebeurtenis. Crozet oorleef die voorval in Nieu-Seeland waar Marion-Dufresne en twaalf ander bemanningslede in 'n Maoriaanval sterf.

Hy keer in Augustus 1776 na Port Louis terug. In sestien jaar van getroude lewe was hy skaars 3 jaar tuis. Dit verhoed hom egter nie om in Maart 1777 as kaptein van die Elisabeth sy swanger vrou by huis te laat nie. Volgens sommige berigte sterf hy in 1780 op sy laaste reis, "iewers op die see". Ander berigte wil dit hê dat hy op 24 September 1782 in Parys gesterf het. Sy vrou, Jeanne-Marguerite Crozet, sterf op 14 Januarie 1784 op twee-en-veertig-jarige ouderdom in Port Louis.

Sedert 1966 dra 'n straat in die Kerzo-distrik van Port Louis die naam Julien Crozet.

Eksterne skakel[wysig | wysig bron]