Kaap Ann
Kaap Ann (Engels: Cape Ann) is 'n rotsagtige skiereiland aan die Atlantiese Oseaan, in die noordooste van die Amerikaanse deelstaat Massachusetts. Die kaap is sowat 30 myl noordoos van Boston geleë en vorm die noordelike uithoek van Massachusetts Bay. Kaap Ann behels die nedersettings Gloucester, Essex, Manchester-by-the-Sea en Rockport.
Etimologie[wysig | wysig bron]
Die eerste kaart van Kaap Ann is deur die ontdekkingsreisiger John Smith geteken, alhoewel hy die kaap oorspronklik na sy geliefde Tragbigzanda vernoem het. Toe hy die kaart aan koning Charles I van Engeland getoon het, het hy voorgestel dat Charles enige van die "barbaarse name" (wat van inheemse Eerste Nasies oorgeneem is) volgens sy eie goeddunke deur Engelse plekname sou kon vervang. Die monarg het vervolgens baie plekname verander, waarvan net vier bewaar gebly het - waaronder Kaap Ann, 'n naam wat Charles ter ere van sy moeder, Anna van Denemarke, gekies het.[1]
Koloniale geskiedenis[wysig | wysig bron]
Die Engelse kolonie op Kaap Ann is in 1624 gestig. Dit was die derde poging om 'n permanente nedersetting in Nieu-Engeland te vesting, naas die Plymouth-kolonie en Nantasket Beach. Twee skepe van die Dorchester Company het 32 setlaars na die kolonie geneem, waarby John Tylly en Thomas Gardner as oorsieners in die plaaslike visserybedryf en plantasie aangestel is. Aangesien hierdie kolonie die Massachusetts Bay-nedersetting voorafgegaan het, is na sy bewoners as die old planters verwys.
Die naam "Kaap Ann" was omstreeks 1634 reeds algemeen gebruiklik. Dit kom op kaarte in William Wood se New England Prospect voor wat in dieselfde jaar verskyn het.
Verwysings[wysig | wysig bron]
- ↑ George R. Stewart: Names on the Land: A Historical Account of Place-Naming in the United States. Houghton Mifflin, 3de uitgawe 1967, bl. 38
Normdata  |
|
|---|