Kaapse Afrikaanse Eisteddfod

Die Kaapse Afrikaanse Eisteddfod is die oudste Afrikaanse eisteddfod in Suid-Afrika en is die eerste keer in 1927 aangebied.

Ontstaan

Die Eisteddfod het voortgespruit uit die Afrikaanse afdeling van die Suid-Afrikaanse Eisteddfod en was die geesteskind van mnr. J.J. Jordaan, skoolhoof van Hoërskool Jan van Riebeeck en voorsitter van die Kaapse tak van die Suid-Afrikaanse Onderwysersunie, wat reeds van omstreeks 1922 verantwoordelik was vir bogenoemde afdeling. Toe die tweetalige eisteddfod in 1927 nie plaasvind nie, het 'n klompie Kaapse Afrikaanssprekendes die geleentheid aangegryp en die eerste aflewering van die Afrikaanse kunswedstryd het op Saterdag 15 Oktober 1927 in Kaapstad begin. Daar was amper 400 inskrywings. Tien jaar later het dit reeds op 1 300 gestaan Dit is in sy geheel deur die Huisgenoot geborg. Tydens die eerste jaar was daar afdelings vir musiek, letterkunde en voordrag, soos die gebruik was tydens die Suid-Afrikaanse Eisteddfod, maar ook die nuwe afdeling "handearbeid", wat tekenwerk, naaldwerk, houtwerk en metaalwerk ingesluit het. Die destydse senator C.J. Langenhoven was die eerste erevoorsitter.

Omvang

Hoewel die eisteddfod tradisioneel deur die Afrikaanse skole van die stadskom (Hoërskool Jan van Riebeeck en Laerskool Jan van Riebeeck) asook die suidelike voorstede ondersteun is, lok dit tans deelnemers van meer as 10 hoërskole, sowat 30 laerskole en talle privaat afrigters van oor die hele Kaapse Skiereiland. Daar is afdelings vir klavier, solosang, orkes-instrumente, blokfluit, koorsang, orkeste, spraakkuns en mimiek en letterkunde en kuns. Hoewel dit 'n Afrikaanse eisteddfod is en een van die doelwitte is om Afrikaans te bevorder, is dit nie slegs vir Afrikaanssprekendes nie.

Prestige

Medaljes en sertifikate van die Kaapse Afrikaanse Eisteddfod is gesog, aangesien daar 'n hoë standaard van beoordeling deur beroepslui is.

Eksterne skakels

• Die eisteddfod se webtuiste Geargiveer 4 Maart 2016 op Wayback Machine.