Kaapse Drie Eeue Stigting

in Wikipedia, die vrye ensiklopedie
Jump to navigation Jump to search

Die Kaapse Drie Eeue Stigting is 'n beskermheer van kuns en kultuur in die Wes-, Noord- en Oos-Kaap.

Doelstelling[wysig | wysig bron]

Die oogmerk van die Stigting is die bewaring, bevordering en aanmoediging van die letterkunde, visuele en uitvoerende kunste, estetiese erfenis, beboude omgewing en natuur. Dit sluit die argitektuur en die plant- en dierelewe van die streek in. Die organisasie is veral geïnteresseerd in die bevordering van kulturele aktiwiteite op die Kaapse platteland.

Geskiedenis[wysig | wysig bron]

In 1950 het die vrugteboere Edward en Harry Molteno van die appelplase by Elgin 'n fonds gestig vir die kulturele ontwikkeling van Kaapstad en sy direkte omgewing. Die Molteno Trust verskaf op 'n deurlopende grondslag geld aan die Stigting. Toe Harry Molteno in 1969 sterf, het die Stigting 'n aansienlike bedrag uit sy boedel ontvang. Sir Alfred Beit was die eerste voorsitter van die Stigting en hy is opgevolg deur Dudley R. D'Ewes.

Toekennings[wysig | wysig bron]

Die Stigting stel geld beskikbaar aan projekte wat hul doel nastreef. Voorbeelde hiervan is studiebeurse, reisbeurse, subsidiëring van publikasies en toekennings aan organisasies vir die bewaring van geboue van kultuur-historiese belang en die natuurlike omgewing. Sedert 2000 is die Dudley D'Ewes-beurs vir nagraadse studie beskikbaar. Persone en organisasies wat hulle verdienstelik gemaak het met die bevordering van die doelstellings van die Stigting is op verskeie maniere, soos byvoorbeeld met die Molteno-medalje, vereer. In die beginjare het Irma Stern, Philip McLachlan, William Fehr, prof. D. Bax en Frank Bradlow toekennings ontvang. Bekende persone wat later jare vereer is, sluit in dr. Anton Rupert in 1976 en weer in 2000, beide Marie-Lou Roux en Wim Tijmens in 1998, prof. J.M. Coetzee in 1995, Jean Welz in 1953, David Pepler in 2001, Patricia Storrar, dr. Dan Sleigh en prof. Dorothea van Zyl aldrie in 2002, Hendrik D. Loock in 2008, Niki Daly, Roy Sargeant , Diane Wilson en Eduard Greyling almal in 2009, Erik Laubscher in 2012 en dr. Elizabeth van Heyningen in 2014.

Muntversameling[wysig | wysig bron]

Die Suid-Afrikaanse kultuur-historiese museum in Kaapstad is in 1967 deur die Stigting gehelp om die Victor des Vages-muntversameling aan te koop. In die versameling is unieke munte wat tydens die bewind van die VOC aan die Kaap gebruik is.

Suid-Afrikaanse sampioene[wysig | wysig bron]

Edith Stephens was 'n plantkundige en lektrise aan die Universiteit van Kaapstad. Sy het van die Stigting 'n toekenning ontvang vir haar bydrae tot die kennis van Suid-Afrikaanse sampioene. Hierdie prysgeld het dit vir haar in 1955 moontlik gemaak om 3,7 ha vleiland aan te koop. Dit vorm vandag die kern van die Edith Stephens-vleilandpark in Lansdowneweg in Philippi op die Kaapse Vlakte.

Bibliografie[wysig | wysig bron]

  • Green, Lawrence G.: When the journey's over. Kaapstad: Howard Timmins, 1972. ISBN 0-86978-030-1
  • www.cape300foundation.org.za