Karelsbrug

in Wikipedia, die vrye ensiklopedie
Jump to navigation Jump to search
'n Uitsig oor die Karelsbrug wat ná die Tweede Wêreldoorlog vir gemotoriseerde vervoer gesluit is
Plesierbote op die Vltava (Moldau)
Die vroeë oggendure is die beste tyd om die Karelsbrug sonder die skares oor te steek

Die Karelsbrug (Tsjeggies: Karlův most) is die oudste brug oor die Vltavarivier (Duits: Moldau) in die Tsjeggiese hoofstad Praag wat stapsgewys tot 1402 of 1406 voltooi is en die historiese middestad met die sogenaamde Kleinkant van Praag (Malá Strana) verbind. Dit is genoem na Karel IV, koning van Boheme en keiser van die Heilige Romeinse Ryk, maar dra dié naam eers sedert 1870. Voorheen het dit bekend gestaan as Steenbrug (Kamenný most) of Praagse Brug. Die brug het deel uitgemaak van die bekroningsroete van Boheemse konings. Tans is dit een van Praag se bekendste bakens wat tot nasionale kulturele monument verklaar is.

Nadat 'n vroeëre brug, die 12de eeuse Judithbrug, in 1342 deur vloedwaters van die Vltava weggespoel is, het Karel IV in 1357 aan Peter Parler (Tsjeggiese spelwyse: Petr Parléř), die bekende Duitse boumeester wat ook die Praagse Sint-Vituskatedraal ontwerp het, die opdrag gegee om 'n nuwe brug te bou. Die brug met 'n lengte van 516 en 'n wydte van 9,5 meter,[1] wat van sandsteenblokke gebou en aan albei kante met torings versterk is, is tussen 1683 en 1928 met dertig standbeelde versier wat heiliges uitbeeld.[2] Die bekendste van dié skulpture, wat op die brugpilare geplaas is, is dié van Sint Johannes van Nepomuk (omstreeks 1345–1393), die nasionale heilige van Tsjeggië.[3]

Historiese bronne verskil oor die presiese voltooiingsdatum. Die brug kon blykbaar reeds voor 1380 oorgesteek word en het in 1378 volgens oorlewering deel uitgemaak van Karel IV se lykstoet. In 1390 is die brugtoring voltooi, terwyl boubedrywighede voortgeduur het tot in 1402 of 1406.

Verwysings[wysig | wysig bron]

Koördinate: 50°5′11″N 14°24′42″O / 50.08639°N 14.41167°O / 50.08639; 14.41167