Kasteel van Chambord
Kasteel van Chambord
Unesco-wêrelderfenis
Chambord
Frankryk
Hoofboufase
Tipe
Jag- en pronkkasteel in die
Franse Renaissance-boustyl
Vertrekke
400
Opgerig vir
Frans I van Frankryk
Webtuiste
www.chambord.org
Die koninklike Kasteel van Chambord in Chambord in die Franse département Loir-et-Cher is die grootste van alle kastele in die Loirevallei met 400 vertrekke. Die kasteel, wat as die ideale voorbeeld van 'n 16de eeuse Franse Renaissance-kasteel beskou word, is vanaf 1519 as jag- en pronkkasteel vir koning Frans I opgerig. Boubedrywighede het voortgeduur tot in die 1540's, maar dit is nooit voltooi nie.
Die kasteel se boustyl is 'n unieke mengsel van tradisionele middeleeuse boukuns en klassieke Renaissance-argitektuur. Die oorspronklike ontwerp word aan Domenico da Cortona toegeskryf. Ander bronne beweer dat die Franse Renaissance-argitek Philibert Delorme by die projek betrokke was of dat Leonardo da Vinci dit ontwerp het.
Die hoofboufase is in 1541 voltooi, maar boubedrywighede het tot 1547 voortgeduur, en die ontwerp is verskeie kere verander. Toe die kasteel voltooiing genader het, het Frans I sy aartsvyand, keiser Karel V, uitgenooi om hom met dié simbool van rykdom en mag te beïndruk. Oorspronklik was Frans I ook van voorneme om die Loire na sy kasteel te herlei, maar dié plan is gestaak. 'n Kleiner systroom is wél herlei.
'n Argitektoniese eienaardigheid, waarvan die konsep aan Leonardo da Vinci toegeskryf word, staan sentraal in die kasteel - 'n dubbele stel helikstrappe wat só ontwerp is dat een persoon op kan stap en 'n ander af, sonder dat hulle mekaar ooit raakloop. Die trap lei na 'n indrukwekkende dakterras wat Cathérine de Medici graag vir haar astrologiese waarnemings gebruik het.
Die trap is as 'n simbool vir Frankryk se politieke status as groot moondheid beskryf en as 'n monument vir die absolute monargie, maar dit is ook as ideale trap vir liefdesgeheime beskou. 'n Liefdesverhouding het moontlik ook die aanleiding vir die bou van die kasteel gegee. Frans I het slegs tydens sy uitspattige jagekspedisies saam met sy hofstaat in Chambord gewoon. Maar die nabygeleë woning van die aantreklike hertogin van Thoury was moontlik ook 'n rede om enkele dae in die kasteel te bly.
In 1792 is van die meubels verkoop en houtversierings verwyder. Die kasteel het 'n tyd lank leeg gestaan, alhoewel daar in die 19de eeu restourasiewerk verrig is. Die laaste privaat eienaar was Paul-Louis Courier, hertog van Bordeaux en graaf van Chambord wat die kasteel in 1921 gekoop het. Dit is sedert 1930 in staatsbesit en staan oop vir die publiek.
Eksterne skakels
[wysig | wysig bron] |
Wikimedia Commons bevat media in verband met Château de Chambord. |
