Landengte van Korinte

in Wikipedia, die vrye ensiklopedie
Jump to navigation Jump to search

Die Landengte van Korinthe is 'n landengte naby die stad Korinthe wat die Peloponnesos met die vasteland van Griekeland verbind. Die landengte is slegs 6,5 km breed op sy smalste punt. Wes daarvan is die Golf van Korinte, en oos die Saroniese Golf.

Vroeër moes skepe wat van Attika na die Golf van Korinte wou vaar, die ompad om die Peloponnesos maak. Die roete was nie net lank nie, maar ook gevaarlik. Baie skepe het aan die klipperige kuste van die drie kape in die suide van die skiereiland verniel. In antieke tye is al gedink dat 'n kanaal deur die landengte hierdie probleem sou oplos.

Historiese bronne noem dat die Korintiese heerser Periander in die sewende eeu v.C. die eerste was om konkrete pogings aan te wend om deur die landengte 'n kanaal te bou. Sy pogings het misluk weens tegniese probleme. In plaas daarvan is 'n oorlandse boothelling gemaak, wat in Grieks, 'n diolkos genoem word. Die diolkos was tussen die dorpe Poseidonia en Schinous, noord van die huidige Kanaal van Korinthe. Ook in die Romeinse tyd is pogings deur Julius Caesar en Tiberius aangewend om die landengte deur te grawe. Dit het tot 1893 geneem vir die Kanaal van Korinthe om daadwerklik te realiseer.

Vanaf 408 het Theodosius II gepoog om die landengte met 'n muur, die Hexamilion, af te sluit, wat met tussenposes van belang sou bly tot die verowering van die Morea despotaat in 1460.[1][2][3]

Verwysings[wysig | wysig bron]

  1. LSJ entry ισθμός
  2. Strabo, Geography. 9.1.6.
  3. Plutarch, Parallel Lives , Theseus Plut. Thes. 25