Lorraine Botha

in Wikipedia, die vrye ensiklopedie

Lorraine Botha is ’n Afrikaanse dramaturg en skrywer en vrou van die voormalige Nasionale Party-minister M.C. Botha.

Lewe en werk[wysig | wysig bron]

Lorraine Anna Gouws is op 7 November 1915 in Port Elizabeth as enigste kind van haar ouers gebore. Sy word in Bloemfontein groot en matrikuleer hier in 1933. Dan sit sy haar studies voort aan die Universiteit van Kaapstad, waar sy in 1936 die B.A.-graad met Latyn, Afrikaans-Nederlands en Engels as hoofvakke behaal. Sy studeer kortliks aan die Universiteitskollege van die Oranje-Vrystaat, waar sy haar inskryf vir die Hoër Onderwysdiploma, maar staak haar studies om ’n betrekking te aanvaar as vertaler in die Vertaalburo van die Staatsdiens in Pretoria. In 1940 tree sy in die huwelik met Michiel Coenraad Botha, Hoofsekretaris van die Afrikaanse Taal- en Kultuurvereniging, wat onder andere verantwoordelik was vir die reëling van die feestelikhede met die inwyding van die Voortrekkermonument in 1949. Later word hy Adjunk Minister van Bantoe-administrasie en Onderwys in die Nasionale Party Kabinet van dr. Hendrik Verwoerd en Minister van Bantoe-Onderwys in die Kabinet van adv. John Vorster. In hierdie hoedanigheid bekragtig hy die gebruik van Afrikaans as die medium van onderrig in swart skole, wat later een van die hoofoorsake is van die Soweto-opstande van Junie 1976. Uit hierdie huwelik word vyf seuns (Christof, Pieter, Michiel, Theunis en Clasie) en twee dogters (Maria is die oudste) gebore. Na haar troue doen sy vryskutwerk deur vertaalwerk te doen en ook nasienwerk vir ’n korrespondensiekollege. Met selfstudie en korrespondensie bekwaam sy haar verder in Nederlands, Frans en Grieks en behaal in 1976 die B.A. Honneurs-graad in Grieks aan die Universiteit van Suid-Afrika. In 1980 behaal sy ook die M.A.-graad in Grieks aan die Universiteit van Suid-Afrika met ’n verhandeling oor “The Hellenica Oxyrhyncia and the Asiatic campaign of Agesilaus”. In haar vrye tyd skilder sy ook graag.

Skryfwerk[wysig | wysig bron]

Die romans “Lang skaduwees” en “Net vir hulle?” behandel beide huweliksprobleme. Sy skryf ook die gewetensdrama “Die keuse”, waarin die hoofkarakter hoogverraad pleeg vir eie gewin. Die karakterisering is nie voldoende gemotiveerd nie en die voorstelling dat Frankryk en die Iberiese lande die land se grootste vyand is, ietwat onwesenlik.

Publikasies[wysig | wysig bron]

Jaar Publikasies
1943 Lang skaduwees
1946 Net vir hulle?
1947 Die keuse

Bronnelys[wysig | wysig bron]

Boeke[wysig | wysig bron]

  • Dekker, G. “Afrikaanse Literatuurgeskiedenis” Nasou Beperk Kaapstad Elfde druk 1970
  • Nienaber, P.J. “Hier is ons skrywers!” Afrikaanse Pers-Boekhandel Johannesburg Eerste uitgawe 1949
  • Nienaber, P.J,; Senekal, J.H en Bothma, T.C. “Mylpale in die geskiedenis van die Afrikaanse letterkunde”
  • Afrikaanse Pers-Boekhandel Tweede hersiene uitgawe 1963
  • Nienaber, P.J. et al “Perspektief en Profiel” Afrikaanse Pers-Boekhandel Johannesburg Derde hersiene uitgawe 1969
  • Van Coller, H.P. (red.) “Perspektief en Profiel Deel I” J.L. van Schaik-Uitgewers Pretoria Eerste uitgawe 1998

Tydskrifte en koerante[wysig | wysig bron]

  • Anoniem “Ses kinders en twee romans” “Die Transvaler” 29 April 1950

Internet[wysig | wysig bron]

Ongepubliseerde dokumente[wysig | wysig bron]