Louis Gallois
Louis Gallois | |
|---|---|
 Louis Gallois | |
| Gebore | 26 Januarie 1944 |
| Bekend vir | Airbus Group |
| Titel | HUB |
Louis Gallois (gebore 26 Januarie 1944) is 'n Franse sakeman. Hy was uitvoerende hoof van EADS, die Europese lugvaartverdedigingsmaatskappy, van 2007 tot 2012.[1]
Biografie[wysig | wysig bron]
Gallois het gedurende sy loopbaan aan die hoof van verskeie openbare departemente gestaan.
Hy is aangestel as hoof van die burgerlike en militêre kabinet van die Franse Ministerie van Verdediging (1988-1989). Hy was van 1989 tot 1992 president en uitvoerende hoof van Snecma, ’n vervaardiger van vliegtuig- en vuurpylenjins, toe hy uitvoerende hoof van Aérospatiale, ’n Franse lugvaartmaatskappy in staatsbesit, geword het. Hy het dié maatskappy bestuur tot 1996, toe hy president geword het van SNCF, Frankryk se nasionale staatsspoorwegmaatskappy.[2]
Gallois het op 2 Julie 2006 by EADS aangesluit nadat Noël Forgeard bedank het. Forgeard het bedank ná bewerings van binnehandel, wat hy ontken het. Forgeard het EADS-aandele verkoop weke voordat filiaal Airbus aangekondig het die Airbus A380 gaan weer vertraag word. Die aankondiging het 'n daling van 26% in EADS se aandeelprys veroorsaak.
Op 9 Oktober 2006 het Gallois Christian Streiff vervang as HUB van die vliegtuigvervaardiger Airbus S.A.S. Op 16 Julie 2007 is die bestuurstruktuur van EADS verander en Gallois is vir 'n tydperk van vyf jaar as HUB van EADS aangestel. Hy is op 31 Mei 2012 deur die destydse uitvoerende hoof van Airbus, Tom Enders, vervang. Gallois is 'n lid van die direksie van die École centrale de Paris en president van die Fondation Villette-Entreprises. In 2012, onmiddellik nadat hy EADS verlaat het, het Gallois die regering se beleggingskommissaris geword. Hy het sy pos tot 2014 beklee.
In Junie 2012 is hy verkies tot president van FNARS (Fédération nationale des Associations d'accueil et de réinsertion sociale), 'n groep wat gefokus is op maatskaplike en solidariteitsaksies.[3]
Louis Gallois het aan HEC Paris en ENA gegradueer.[4]
Verwysings[wysig | wysig bron]
Eksterne skakels[wysig | wysig bron]
Wikimedia Commons het meer media in die kategorie Louis Gallois.
