Louise Boshoff
 | Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Louise Boshoff (gebore 1957 op die Hoëveld) is 'n Suid-Afrikaanse sielkundige en Afrikaanse digter.
Lewe en werk[wysig | wysig bron]
Boshoff matrikuleer in 1975 aan die Hoërskool Lyttelton (later Verwoerdburg Hoërskool). Aanvanklik studeer sy Regswese aan die Universiteit van Pretoria, maar besluit na haar eerste jaar om liewer ’n B.A.-graad te verwerf met Afrikaans en Sielkunde as hoofvakke. Na voltooiing van die graad in 1978 studeer sy verder in die Sielkunde en behaal ’n B.A. Honneurs-graad en dan in 1983 ’n M.A.-graad in Beradingsielkunde. Sy voltooi haar internskap aan die Student Beradingsburo van die Universiteit van Pretoria. In 2002 verwerf sy ’n Ph.D.-graad in Kindersielkunde en verwante velde aan die Universiteit van die Oranje-Vrystaat. Sy kwalifiseer ook as ’n SHIP (Spontaneous Healing Intrasystemic Process) fasiliteerder in Oktober 2006. Sy staan in private praktyk as sielkundige en op ’n deeltydse basis werk sy vir dertien jaar by ’n remediërende skool. Haar spesialisvelde is loopbaanberading, ontledings deur middel van spesialistoetse en verhoudingsberading. Sy is getroud met Louis Prinsen, het twee dogters en woon in Pretoria.
Skryfwerk[wysig | wysig bron]
Haar gedigte word van vroeg af in Tydskrif vir Letterkunde geplaas en sy publiseer ook kinderstories in Custos. “Handlandskap”, haar debuutbundel, bevat verskeie liefdesgedigte en natuurindrukke. Die gedig “Sondagoggend” is ’n hoogtepunt in die bundel. “Witpad” bevat naas liefdesgedigte en natuurindrukke ook reisgedigte en huldigingsgedigte aan ’n kinds geworde vader en sterwende vriendin. Daar is ook verse vir die kind, wat sy wil vashou en beskerm en wil voorberei vir die lewensreis. Van haar gedigte word in verskeie versamelbundels opgeneem, waaronder “Groot verseboek”, “Die Afrikaanse poësie in ’n duisend en enkele gedigte”, “Die mooiste Afrikaanse liefdesgedigte” en “Verskeurings”. In 2020 word haar gedigte ‘gesprek’ en ‘Ook Rita’ in Vers en vrou opgeneem.[1] Haar kortverhaal “Polish” word opgeneem in die huldigingsbundel “Amfiteater” onder redaksie van P.H. Roodt, wat skryfwerk van oud-studente van die Universiteit van Pretoria bevat.
Publikasies[wysig | wysig bron]
| Jaar | Publikasies |
|---|---|
| 1988 | Handlandskap |
| 1999 | Witpad |
Verwysings[wysig | wysig bron]
- ↑ De Wet, K. (samest.) Vers & vrou. Kaapstad: Human & Rousseau. 2020
Bronnelys[wysig | wysig bron]
Boeke[wysig | wysig bron]
- Boshoff, Louise “Handlandskap“ Perskor-Uitgewery Johannesburg en Kaapstad 1988
- Kannemeyer, J.C. “Die Afrikaanse literatuur 1652-2004” Human & Rousseau Kaapstad en Pretoria Eerste
- uitgawe 2005
- Van Coller, H.P. (red.) “Perspektief en Profiel Deel 2” J.L. van Schaik-Uitgewers Pretoria Eerste uitgawe 1999
- Van Coller, H.P. (red.) “Perspektief en Profiel Deel 3” Van Schaik-Uitgewers Pretoria Eerste uitgawe 2006