Meerhoffkasteel

Meerhoffkasteel is 'n alleenstaande koppie naby Nuwerus wat sedert die begin van die blanke vestiging aan die Kaap as 'n uitspanning gebruik is.

Hierdie opvallende spitskoppie lê 15 km wes van Nuwerus in die Hardeveld van Namakwaland. In die koppie is 'n vlak grot wat aan 'n hele aantal mense skuiling kan bied. 'n Standhoudende fontein lewer brak water wat soms net-net drinkbaar is. Die spruitjie het die veelseggende naam Varsbrak.

Vir baie jare het die roete van die reisigers van Kaapstad oor die Olifantsrivier na die streke rondom die westelike deel van die Oranjerivier hier verbygegaan. Tussen 1660 en 1664 het die VOC ses reisgeselskappe uitgestuur op soek na die goudstad Vigiti Magna en Monomotapa. VOC-chirurgyn Pieter van Meerhoff (1635–1667) het al hierdie reise meegemaak en sy naam aan die koppie verleen. Hulle is gevolg deur soekers na koper, jagters, boere, avonturiers en mense wat vee wou ruil met en sendingwerk wou doen onder die Namas. Bekende name onder hulle was Jan Danckaert (±1660), Simon van der Stel, Olof Bergh (1643–1724), Peter Kolbe (1657–1725), Johannes Tobias Rhenius (±1700-1751), Jan Philip Giebeler, Jacobus Coetzee (±1730-±1804), Hieronimus Cruse (†1687), Hendrik Hop (1716–1771), Robert Jacob Gordon (1743–1795), Francis Masson (1741–1805), Christian Albrecht (±1773-1815), John Campbell (1766–1840), en Jacob van Reenen (1755–1806). 'n Hele aantal van hierdie besoekers het hul name in die grotwand uitgekerf.

Van Meerhoff was met sy besoek in 1661 die eerste blanke in Suid-Afrika wat 'n kameelperd sien toe hy twee by Meerhoffkasteel teenkom.

In die volksmond het deur die jare heen die naam Meerhoffkasteel baie variasies opgelewer. Later het die plaas bekendgestaan as Mierhoofd Kasteel.

Op 28 Julie 1978 het die Raad vir Nasionale Gedenkwaardighede 'n kopergedenkplaat in die grot aangebring.

Bibliografie

• Scholtz, P.L.: Meerhoffkasteel – historiese heuwel in die Hardeveld. dspace.nwu.ac.za/bitstream/handle/10394/5152/No8(1980)
• Stewart, Roger: A selection of essays inspired by maps of the Cape. Tokai: Historical Media, 2016. (The Cape Odyssey, 107). ISBN 978-0-9946697-4-2