Milton Behrman

Milton Yoland Behrman (Muizenberg, Kaapland, 3 Junie 1918 – Kaapstad, 2 Augustus 1981) was ’n Suid-Afrikaanse sakeman en onder meer direkteur en maatskappysekretaris van Columbus Electrical Appliances (Edms.) Bpk., Pollnick and Gordon {Edms.) Bpk. en hul filiale.

Behrman was die seun van Jeannie en Aaron Behrman. Hy het sy skoolopleiding aan SACS ontvang en daarna aan die Universiteit van Kaapstad studeer en toe aan Unisa. In 1938 het hy aangesluit by ’n rekenmeestersfirma in Kaapstad as ’n ingeskrewe klerk. Met die uitbreek van die Tweede Wêreldoorlog het hy aangesluit by die Suid-Afrikaanse Ingenieurskorps as sappeur. Nadat hy tot waarnemende kaptein bevorder is, is hy aan die Britse ministerie van voorrade gesekondeer om te help met die vervaardiging van gifgas vir oorlogsgebruik.

Ná demobilisasie het hy in 1945 aangesluit by Columbus Electrical Appl. (Edms.) Bpk. as assistentsekretaris. In 1954 is hy in die direksie aangesluit. Hy was ’n tyd lank voorsitter van die Westelike Provinsie-tak van die Radio Refrigeration and Electrical Appliance Association. Ook was hy lid van die raad van die Kaapse Hervormde (Joodse) gemeente.

Hy is op 21 Junie 1951 met Esther (Essie), dogter van H. Romoff, getroud. Een seun is uit die huwelik gebore. Sy liefhebberye was hengel en rolbal. In die vroeë 1960's het die egpaar by Jocyn Court 7, Bantrybaai, gewoon.

Bronne

• (af) (en) Kruger, dr. D.F. 1963. Wie is wie in Suid-Afrika. Johannesburg: Vitae Uitgewers.
• (en) Sy genealogiese besonderhede op die webtuiste Geni.com. URL besoek op 19 November 2017.