Monoi-olie

in Wikipedia, die vrye ensiklopedie
Monoi-olie word gemaak van Tiaré tahiti en klapperolie.

Monoi-olie of Monoï-olie[1] is ’n parfuumolie wat gemaak word deur blomme van die struik Tiaré tahiti in klapperolie te laat week. Monoï (ma-noi uitgespreek) is ’n ou Tahitiaanse woord wat "gegeurde olie" beteken. Die olie word algemeen in Frans-Polinesië gebruik as ’n vel- en haarversagter.

In die vervaardiging van Monoi-olie word ’n streng stel reëls gevolg, vandat die blomme met die hand gepluk word tot met die berging en versending van die eindproduk.

Geskiedenis[wysig | wysig bron]

Dit is onbekend van wanneer af Monoi-olie gemaak word. Die oorsprong kan egter nagespeur word tot minstens 2 000 jaar gelede, toe dit deur die Maohi-volk, die inheemse Polinesiërs, gemaak is. Vroeë Europeërs wat die Polinesiese eilande besoek het, onder andere James Cook, het berig oor die gebruik van die olie vir medisinale, kosmetiese en godsdienstige doeleindes. Dit het van geboorte tot die dood ’n rol in die eilandbewoners se lewe gespeel: Babas is daarmee gesmeer om te keer dat hulle in die hitte dehidreer en in die winter koud kry. Wanneer ’n persoon gesterf het, is hul liggaam met Monoi-olie gesalf om hul reis na die hiernamaals te vergemaklik.

Tydens godsdiensseremonies in die marae (tempels) het priesters die olie gebruik om heilige voorwerpe te salf en offerandes te reinig.

Seevaarders het dit gebruik om hulle teen die koue winde en sout water te beskerm. Selfs vandag smeer duikers die olie aan hul hele lyf vir dieselfde doel.

Die Tiaré-blom.

Algemene gebruike[wysig | wysig bron]

Volgens moderne vervaardigertoetse bevat Monoi-olie baie metielsalisilaat, wat die vel streel. Dit dring glo die vel binne, rehidreer die lae van die epidermis en beskerm dit.

Monoi-olie word gebruik:

  • Ná ’n stort of bad om die vel te rehidreer
  • Voor en ná ’n swemsessie om die vel teen die son, wind en water te beskerm
  • Voor hare gewas word om dit te help opknap en te laat blink
  • In die water tydens ’n bad
  • Vir masserings
  • Teen sonbrand

Verwysings[wysig | wysig bron]

  1. "Monoï Tiaré Tahiti History". Geargiveer vanaf die oorspronklike op 2 Augustus 2016. Besoek op 6 Augustus 2016.

Eksterne skakels[wysig | wysig bron]